Chhattisgarh-a Maoist nena inbeihnaah security force 22 thi

Chhattisgarh-a Bijapur district-ah Inrinni khan security force leh Maoist hel inbeiin, security force 22 an thi a, chin hriat lohin pakhat a awm bawk.

Inrinni khan security force joint team, sipai 2,000 chuang awmna te chuan Maoist hel hluar leh chakna bial nia sawi, South Bastre forest huama Bijapur leh Sukma district-ah beihpui an thlak a ni. Chhun dar 12 velah Maoist helte hian lo ambush-in an inkap zui a, darkar thum chuang zet an inkap a ni.

Central Reserve Police Force (CRPF) official-te chuan security force-te lo beihna atan hian Maoist helte hian light machine gun (LMG), under-barrel grenade launcher (UBGL) leh desi rocket-te an hmang niin an sawi.

Helho laka beihpui thlaktu zingah hian CRPF elite anti-Maoist Commando Battalion for Resolute Action (CoBra) unit bakah, state District Reserve Group (DRG) leh Special Task Force (STF) an tel a ni.

Security force leh Maoist hel inbeihna thlen hnu hian, union home minister Amit Shah chuan Chhattisgarh chief minister Bhupesh Baghel chu biain, thil thlengte a zawtfiah. Union Minister hian Director General of the Central Reserve Police Force (CRPF) Kuldiep Singh hnenah Chhattisgarh-ah kal a, thil awmdan enfiah turin a ti nghal bawk.

Amit Shah chuan sorkar laipui leh state sorkar chuan helte hi beiin hnehna an chang ngei dawn tih a sawi a, hel beihna kawngah sorkar laipui chuan a ṭul ang apiangah a pui dawn tih Chhattisgarh CM hi an hrilh nghal bawk a ni. Union Home Minister chuan hel nena inbeihnaa nunna chan, sipaite chu zahna a hlan tih a sawi nghal a, an inpekna leh huaisenna chu India-in a theihnghilh ngai lo ang, a ti.

President Ram Nath Kovind pawhin sipai thite chu zahna hlanin, an inpekna chu theihnghilh a ni dawn lo, a ti. Prime minister Narendra Modi chuan Maoist hel nena inbeihnaa sipai thi chhungte a tuarpui tak zat tih sawiin, martar huaisente inpekna chu hriatreng a ni dawn a ni, tiin hliam tuarte pawh an dam thuai a duhsak thu a sawi bawk.