Vawiinah LS inthlan thawh hnihna State 12-a constituency 95-ah vote thlak dawn

Lok Sabha inthlan thawh hnihna chu vawiin hian state leh union territory 12-a constituency 95-ah neih a ni dawn.

Inthlan thawh hnihna neihna turin a huam hi Tamil Nadu-ah seat 38, Karnataka-ah seat 14, Maharashtra-ah seat 10, Uttar Pradesh-ah 8, Assam-ah 5, Bihar-ah 5, Odisha-ah 5, Chhattisgarh-ah 3, West Bengal-ah 3, Jammu and Kashmir-ah 2, Manipur leh Puducherry-ah seat khat ve ve a ni. A tira inthlan thawh hnihna neihna tura telh, Tripura-a bial pakhat chu dan leh thupek kaihhnawih thil avangin Election Commission chuan inthlan hun hi April 23-ah a sawn sak a, Tamil Nadu-a Vellore bialah pawh candidate pakhat nena inzawmna nei inah pawisa fai ṭhahnem tak man a nih vangin ṭhulh a ni bawk.

Inthlan thawh hnihna, bial 95-a neih turah hian voter 15,97,34,000 an awm a, candidate 1,629 an awm bawk. Vote thlak­na tur polling booth 1,81,000 siam a ni.

Tamil Nadu

Tamil Nadu-a Lok Sabha seat 39 awm zinga seat 38-ah vawiin hian vote thlak a ni ang. Bial 38-ah hian candidate 822 awmin voter vaibelchhe 5.8 an awm. Vawiina Lok Sabha inthlan neih rual hian assembly constituency 18-ah by-election neih a ni dawn bawk a, May 19 khian assembly constituency 4-ah by-election hi neih leh a ni bawk ang. By-election neih turah hian candidate 269 an awm a ni. Vote thlakna tur polling booth 67,700 siam niin heng zinga 8,300 chu sensitive area-ah puan a ni a, booth 30,000-ah live webcasting tih tum a ni. A ṭum khatna atan polling booth zawng zawngah Voter Verified Paper Audit Trail (VVPAT ) hman a ni dawn bawk.

Karnataka

Karnataka-a Parliament constituency 28 zinga 14-ah vawiin hian inthlan neih a ni dawn. Karnataka-ah hian vote nei 2,63,38,277 awmin polling station 30,410 siam a ni. Seat 14-ah hian candidate 241 an awm a, an zingah hian hmeichhia 17 an tel.

Maharashtra

Parliament constituency 10-a inthlan neih turah hian vote nei mi vaibelchhe 3.36 an awm a, candidate 179 an awm. Candidate zingah hian chief minister hlui pahnih Ashok Chavan leh Sushilkumar Shinde te pawh an tel a ni.

Uttar Pradesh

Uttar Pradesh-a Parliament constituency 80 zinga 8-ah vawiin hian inthlan neih a ni dawn. Inthlan neihna tur hi UP khawthlang lam bial niin kum 2014 inthlanpuiah khan heng seat-te hi BJP in a la vek a ni. Vote nei maktaduai 15 awmin, candidate 87 an awm a, an zinga 26 chu independent candidate an ni.

Assam

Assam-ah hian seat 5-ah vote thlak a ni dawn a, polling station 8,992 awmin vote nei mi 69,10,592 an awm. Candidate 50 an awm a, an zingah hian hmeichhia 3 telin independent candidate 19 an awm tel bawk.

Bihar

Bihar seat 5-a inthlan neih turah hian vote nei mi 85,52,274 awmin, mipa 44,92,599 leh hmeichhia 40,59,375 an awm a, third gender 300 an awm bawk. Vote thlakna tur hian polling station 8,644 siam a ni.

Odisha

Odisha-a Lok Sabha seat 5-ah vawiin hian vote thlak a ni dawn a, hemi rual hian assembly seat 35-ah inthlan thawh hnihna neih nghal a ni bawk ang. Lok Sabha seat 5-ah hian candidate 35 awmin assembly constituency 35-ah candidate 244 an awm bawk. Lok Sabha candidate zingah hian hmeichhia panga an awm a, assembly candidate zingah hmeichhia 25 an awm a ni. Vote nei mi 76,93,123 an awm.

Chhattisgarh

Chhattisgarh-ah chuan Lok Sabha bial pathumah inthlan neih a ni dawn a, candidate 36 an awm. Vote nei mi 49,07,489 awmin heng zingah 24,69,110 chu hmeichhia an ni a, mipa 24,38,320 an awm bawk.

Chhattisgharh hian Lok Sabha seat 11 neiin, April 11 khan Naxal hluarna bial Bas­tar-ah vote thlak a ni tawh. A bak bial 7-ah chuan April 23 hian inthlan neih a ni ang.

West Bengal

West Bengal Lok Sabha seat 3-a inthlan neih turah candidate 37 an awm a, vote nei 49,32,346 an awm a ni. Inthlanna felfai tak neih a nih theih nan hian vote thlakna tur, polling booth 5,000 chuangah venhim hna thawk turin EC chuan central force company 194 a dah a ni. Polling booth tinah VVPAT hman a ni dawn bawk.

Jammu and Kashmir

J&K-a constituency pahnihah inthlan neih a ni dawn a, vote nei 29,60,027 an awm. Bial pahnihah hian candidate 12 ve ve an awm bawk. Polling station 4,426 siam a ni.

Manipur

Manipur-a Parliament constituency pahnih awma a pakhat zawk, Inner Manipur-ah inthlan hi neih a ni dawn a, candidate 11 an awm. Inthlan thawh hnihnaah hian vote nei 9,28,626 awmin polling station 1300 a awm.

Puducherry

Puducherry union territory-a Lok Sabha seat awmchhunah vawiin hian inthlan neih a ni dawn a, vote nei nuai 9 chuang an awm.

Candidate 18 awmin, an zinga Congress candidate V Vaithilingam leh NDA thlawptu lam, AINRC candidate K Narayanasamy te chu inbitum ber tura rin an ni.