Pawisa tih thih hnu kum 2 chhungin mi nuai 50 in hna an chan

Centre for Sustainable Employment, Azim Premji University, Bengaluru in Thawhlehnia report a tihchhuahah, kum 2016 November thlaa Prime Minister Narendra Modi-an pawisa note lian pahnih, Rs 500 leh Rs 1,000 a tih thih aṭanga kum hnih chhungin mi nuai 50 zetin an hna an chan tih a tarlang.

Report an tihchhuah hi "State of Working India 2019" tih niin, kum hnih chhunga mi nuai tam takin hna an chan hi pawisa tih thihin a nghawng a ni emaw, a ni lo emaw pawh ni se thil ngaihven ngai tak a nih thu a tarlang a ni. Hna chan zingah hian mipa aiin hmeichhia an tam zawk tih a tarlang bawk.

Kumin kumtira sorkar report putruah pawh khan ramchhunga hna thawh tur nei lo, unemployment rate chu kum 2017-18 khan 6.1% tlingin, kum 45 chhunga a san ber ṭum a thleng hial a ni. Mahse he report hi sorkar lam chuan a hnuah a pha a, NITI Aayog vice chairman Rajiv Kumar chuan report chu finfiah loh a nih thu a sawi.