India rama hri kai thar tam ber ni thleng

India ramah Pathianni khan Covid-19 hri kai thar mi nuai chuang an awm a, ram chhunga Covid-19 hripui a len hnua ni khatah hri kai thar an tam ber ni a ni.

Union health ministry tarlan danin, Pathianni khan hri kai thar mi 1,03,558 an awm a, ram pumah hri kai hmuh chhuah hi 1,25,89,067 an tling tawh a ni. Pathianni hmaa India rama ni khata hri kai thar tam ber ni chu nikum September 17 ka niin, hemi ni hian Covid-19 hri kai thar mi 97,894 an awm.

Hun eng emaw chen hri leng hian ziaawm lam a pan hman a, February thla tir lamah kha chuan nitina hri kai thar pawh an kiam thla hman hle. Hei vang hian hri leng laka invenna tura khuahkhirhna siamte pawh thlahdul ṭan a ni a, mi tam takin pawn chhuahnaah face mask vuah an ngai pawimawh lo ṭan a, social distancing dan pawhin zawm a hlawh lo hman hle. Mahse hri leng hi rawn hluar chho lehin, February thla tir lam nena khaikhin chuan ni khata hri kai hmuh thar hi a let 12 dawnin an pung chho leh tawh a, kar liam ta chhung khan India ram chu hri kai hmuh chhuah thar tamna ber a ni.

Hri kai thar zinga mi 57,074 hi Maharashtra state-a mi an ni a, Mumbai khawpui bikah Pathianni hian hri kai thar mi 11,163 an awm. State chhunga hri leng a hluar chhoh leh nasat avangin state sorkar chuan weekend lockdown, Zirtawpni zan dar 8 aṭanga Thawhṭanni zing dar 7 thleng puan zel a ni dawn tih a sawi. Weekend lockdown bakah kar leh Thawhṭanni zan dar 8 aṭangin khuahkhirhna khauh tak siam a ni dawn tih a sawi bawk. Heng khuahkhirhna siamte hi April 30 thleng hman a ni ang.

Delhi khawpuiah pawh hri kai thar mi 4,000 chuang awmin, kumin chhunga ni khata hri kai tam ber ni a ni. Hri kai thar tam zualna dangte chu Chhattisgarh (5,250), Karnataka (4,553) leh Uttar Pradesh (4,136) te an ni.

Sorkar laipui chuan hri leng hluarna state pathum - Maharashtra, Punjab leh Chhattisgarh-ah an state dinhmun leh hri leng laka invenna kalpui a nih dan te enpui turin central team tirh a tum. Ram pumah hri kai an pun chhoh mek laiin state pali - Assam, Bengal, Tamil Nadu leh Kerala bakah Pondicherry union territory-ah te assembly inthlan neih niin, heng hmunah hian election rally neiin mi tam tak an pungkhawm reng bawk.

Hri leng thawh hnihnain naupang nghawng na zawk

Reliance Hospital and Fortis Hospital, Navi Mumbai-a consultant pediatrician Dr Subash Rao chuan ram chhunga hri leng thawh hnihna thleng mek chuan a thawh khatna aiin naupang a nghawng na zawk niin a sawi.

Dr Roa chuan a thawh hnihnaa hri leng mek hi a hri a inthlak danglam a, a darh chak hle a, a bikin naupangah an tuar na niin a sawi. Puitlingte aiin naupangte hian symptom pawh an nei hmasa a ni, a ti.

"Covid hri thawh hnihna hian a hma aiin naupangte a nghawng na a, naupangte hian symptom nei hmasain an lak aṭang hian puitlingten an kai zawk fo a ni. Hri leng thawh khatnaa hri kai naupangte kha a tam zawk chu harsatna nei lo, asymptomatic an ni a, mahse a thawh hnihnaah chuan naupangte hian symptom - khawsik, khuk ro, luak, chau, thil ei chakna bo leh symptom dangte an nei ta fo a ni," a ti. Naupang zinga hri kai an tam chhoh chhan chu inkhuahkhirhnate thlah dul a, pawn lamah infiama an chhuah fo vang te, an zin kual leh invenna tura kaihhruaina siamte zawm ṭhat a ni tak loh vangte a ni tih a sawi.