Inthlan neihna tur Tamil Nadu-ah Rs vbc 428 hu man

Tamil Nadu-ah assembly inthlan neih tura campaign-na atana hman tum thil hrang hrang mante chu cheng vaibelchhe 428 hu a tling tawh tih Election Commission chuan a sawi. Tamil Nadu hi vawiinah an inthlang dawn a ni.

Thuneituten thil chi hrang hrang an man zingah pawisa fai cheng vaibelchhe 225.5, rangkachak leh tlereuh dang Rs vbc 176.11 hu bakah zu tam tham tak man a ni.

State chief electoral officer chuan Coimbatore, Tiruppur leh Chennai aṭangin thil an man hnem ber tih sawiin, zing leh zanah uluk taka duty a nih thu a sawi. Inthlan neihna atana candidate leh political party-te sum hman zat enfiah tur hian expenditure observer 118 dah an ni tih a sawi bawk.

Vawiina assembly seat 234-a inthlan neih turah hian candidate 3,998 an awm a, vote nei vaibelchhe 6.28 an awm.