Home Minister-in Chhattisgarh a tlawh

Union home minister Amit Shah chuan nimin khan Maoist helten security force 22 an thahna hmun, Chhattisgarh-a Bastgar bial a tlawh a, high-level meeting a neihpui.

Amit Shah hian zing dar 10.35 vel khan Bastar district-a Jagadalpur airport a thleng a, Police Lines-ah hel kut tuara thi security force-te zahna pangpar a dah nghal a ni. Shah hian union home minister a nih hnua Bastar bial a tlawhna hmasa ber a ni.

Minister hian Police Coordination Centre-ah high-level meeting a neihpui bawk a, he hunah hian state police leh central reserve police force (CRPF) senior official-te an tel. Meeting zawh hnuah helicopter-in Bijapur-a CRPF Basaguda camp a tlawh a, CRPF leh state police-te nen an inkawm a ni. Camp aṭang hian Raipur pan lehin, helho nena inbeihnaa sipai hliam tuar, damdawi-ina enkawl mekte a tlawh leh bawk.

Minister chuan Naxal helte central sorkar leh state sorkar chuan nasa zawka a beih let zel tur thu a sawi a, hel beihnaa an nunna chante chu India ramin a hre reng dawn a ni, a ti.

Inrinni khan security force joint team, sipai 2,000 chuang awmna te chuan Maoist hel hluar leh chakna bial nia sawi, South Bastre forest huama Bijapur leh Sukma district-ah beihpui an thlak a ni. Chhun dar 12 velah Maoist helte hian lo ambush-in an inkap zui a, darkar thum chuang zet an inkap a, sipai 22 an thi a ni. Sipai thi zinga pariat hi CRPF niin, CRPF elite unit, CoBRA commando pasarih an tel. Bastariya battalion-a mi sipai pakhat, District Reserve Guard (DRG) pariat leh Special Task Force (STF) mi paruk an thi bawk. Chin hriat lohin sipai pakhat a la awm mek a ni.