JeM-ten rel station-a bomb tihpuahah vau

Pakistan-a hmunpui nei, Jaish-e-Mohammed (JeM) firfiak pawl chuan Punjab, Rajasthan leh Uttarakhand-a rel station te chu bomb chhiatah a vau. JeM area commander Mansoor Ahmed chuan vauna lehkha hi Hindi-a ziakin, Railways thu­neitute hnenah a thawn a ni.

Northern Railway, Firozpur division-a Divisional Rail Manager Vivek Kumar hnena vauna lehkha an thawnah JeM chuan an pawl mi leh sate thah an nih avangin phuba lak nan May 13 hian Firozpur, Jalandhar, Faridkot, Amritsar leh Barnala rel station te chu an bomb dawn niin an sawi. Hei bakah hian Rajasthan rel station, bus stand leh Jaipur, Bikaner, Jodhpur leh Sriganganagar-a sipai hmunte beihah an vau tel bawk.

Uttarakhand-a Railway autho­rity-te hnena lehkha dang an thawnah, May 6-ah Roorkee, Haridwar leh rel station dang 10 chu bomb-ah an vau a, hemi chungchang hi Uttarakhand Police te hriattir nghal a ni.

Firfiakte vau vang han state pathumah hian venhimna khauh taka kalpui nghal a ni. Government Railway Police (GRP) leh Railway Protection Force (RPF) te chuan vauna lehkhaa an ziah lan rel station hrang hrangte chu ngawrh takin an veng nghal a, khualzinte leh an bungruate chu uluk taka enfiah sak an ni.