Sorkarin LoC kaltlanga insumdawn tawnna khar

Ministry of Home Affairs chuan nimin aṭang khan Pakistan-occupied Jammu and Kashmir nena Line of Control (LoC) kaltlanga insumdawn tawnna chu a khar.

Sorkar laipui chuan LoC trade route chu Pakistan-a pawl ṭhenkhat ten dan kalha ralthuam tawlhna atan te, ruihhlo leh pawisa lem tawlhna atan te an hmang ṭhin nia report a dawn avangin he thupek hi a tichhuak a ni.

LoC kaltlanga PoK nena insumdawn tawnna hi kar khatah ni li kalpui a ni ṭhin a, barter system-a kalpui niin chhiah lak a ni ngai lo. Mahse mi ṭhenkhat ten sumdawnna dik lo kalpuina remchangah an lo hmang ṭhin a ni. Ministry chuan LoC-a insumdawn tawnna kalpui leh hun tur chu ngaihtuah ṭhat a la ni dawn tih an sawi.