Babri Masjid tihchhiat a ni kha ka chhuang hle : BJP candidate EC-in insawifiah turin hriattir
Bharatiya Janata Party (BJP) MP candidate Pragya Thakur-i chuan Ayodhya-a Hindu leh Muslim te ram inchuhnaa Hindu-ten Babri Masjid an tihchhiatsak chu a chhuang hle tih a sawi a, he a thusawi avang hian Election Commission chuan insawifiah tura hriattirna a pe nghal a ni.
Pragya Thakur-i hi Madhya Pradesh-a Bhopal biala BJP candidate a ni,.
TV9-in an kawmnaah, Thakur-i chuan, "Kan ram tana bawlhhlawh pakhat chu kan thianfai a ni. Babri Masjid kan tichhia a, pathian-in hetiang hun remchang mi pe hi ka chhuang hle a ni. He hmunah hian Ram Temple kan din ngei dawn a ni", a ti.
BJP candidate-in sakhaw inhuatna lam hawi thu a sawi hi party dangte chuan na takin an sawisel nghal a, Congress chuan BJP hian an candidate chungah hian action a la dawn em tih an zawt. Congress thupuangtu Manak Agarwal chuan, BJP leh PM Modi chuan hemi chungchang hi an sawifiah ngei a ngaih thu leh, Thakur-i chu inthlan chuh ve tlaka an ngaih loh thu a sawi. EC pawhin notice a tichhuak tawh a, PM Modi hian ngaihdam a dil a nih loh pawhin an party ṭanhmun chungchang a sawifiah a ngai a ni, tiin a sawi.
Pragya Thakur-i hian Malegaon bomb puak thubuai chhuinaa amah tiduhdahtu nia a puh, 26/11 hero Hemant Karkare chu anchhia a lawh vangin 2008-a firfiakten Mumbai an beihnaah khan a thi a ni, a lo ti tawh bawk. "Hemant Karkare chu ram dotu a ni, sakhaw ngaihsak lo a ni. Tihchhiat a ni thuai dawn tih ka sawi a, a hnu lawkah firfiakten an that ta mai a ni" tiin a sawi. He a thusawi avang hian sawisel a hlawh hle bakah, EC pawhin notice a pe bawk a ni. Sawisel a tawh nasat vangin a thusawi hi a sut leh tih a hnuah a sawi leh a ni.
Kum 48 mi, Pragya Thakur-i hi kum 2008-a Malegaon bomb puak kaihhnawihah khan Unlawful Activities (Prevention) Act hnuaiah thubuai nei lai a ni a, bail-a chhuah tir mek a ni. Malegaon-a pawikhawihna thleng hi Hindu firfiakte tih nia puh a ni a, bomb puakah hian mi paruk an thi a ni.