Arun Jaitley-an Jet Airways buaina ngaihtuah pui a tiam : CEO Vinay Dube
Leiba ngah avanga kar kalta Nilaini aṭanga tihtawp lailawk, Jet Airways chuan an harsatna tawh mek chu union finance minister Arun Jaitley chuan a chinfel dan kawng lo ngaihtuah pui a tiam niin chief executive Vinay Dube chuan a sawi.
Dube hoin kar kalta Inrinni khan Maharash-tra Finance Minister Sudhir Mungantiwar, civil aviation secretary Pradeep Singh Kharola, airline chief financial officer Amit Agarwal bakah pilot, engineer, cabin crew leh ground staff union aiawhten Jaitley hi an hmu a ni.
Minister an hmuh hnua reporter-te a kawmnaah, Dube chuan airline-a hnathawkte chu an thla khat hlawh tal pek a ngai tih a sawi a, hemi chungchang hi finance minister chuan lo ngaihtuah pui a tiam tih a sawi.
Jet Airways hian sum lama harsatna nasa tak a tawh avangin a hnathawkte hi March thla hlawh pawh a pe thei lo a ni. Hnathawktute thla khat hlawh pekna tur atan hian cheng vaibelchhe 170 vel a mamawh dawn a ni.