India-ah hri kai vbc 1.26 chuang awm tawh

India ramah Covid-19 hri kai hmuh chhuah belh zel an ni a, hri kai hmuh chhuah tawh hi vaibelchhe 1.26 an chuang tawh tih union health ministry chuan a tarlang.

Thawhṭanni khan hri kai thar mi 96,982 an awm belh leh a, hemi ni vek hian hripui vanga thi mi 446 an awm bawk. India hi khawvela US leh Brazil dawta coronavirus kai tamna ber ram a ni. Ram chhunga hri leng hluar berna state, Maharashtra-ah chuan Thawhṭanni khan hri kai thar 47,288 awm belh lehin, state chhunga hri kai hmuh tawh nuai 3.23 an tling tawh.

Maharashtra chief minister Uddhav Thackeray chuan an state-a hri lengin zual lam a pan chhoh zel vangin, prime minister Narendra Modi hnenah kum 25 chin chu Covid-19 vaccine lak phalsak turin a ngen. Kum 25 chinte hnena vaccine hi pek a nih chuan, eizawnna atana nitina hna thawka chhuah ngai, ṭhalai zawkte zinga hri darh zual tur hi a ven theih a beisei thu a sawi.

John Hopkins University tarlan danin, nimin thleng khan khawvel pumah Covid-19 hri kai hi mi 13,16,96,594 an tling tawh a, an zinga mi 28,59,357 in an thihpui tawh a ni. US chu hri kai tamna leh thihpui tamna ber ram a ni chhunzawm zel a, US bikah hian hri kai mi 3,07,77,338 awm tawhin, mi 5,55,403 in an thihpui tawh bawk.

PM-in CM te meeting neihpui leh dawn

Ram chhungah hri lengin zual lam a pan chho zel avangin prime minister Narendra Modi chuan Ningani hian Chief Minister-te meeting a neihpui leh dawn a, Covid-19 leng mek chungchang leh vaccine pek hna kalpui mekte a sawipui ang.

March 17 khan PM hian CM-te chu meeting a lo neihpui tawh bawk a, ram chhunga hmun ṭhenkhata hri leng hluar chho leh chungchangah chak taka hma lak a ṭul thute a sawi a ni. Pathianni khan PM ho hian high-level meeting neih a ni bawk a, hri leng hluarna state pathum - Maharashtra, Punjab leh Chhatisgarh-a central team tirh an lo rel tawh bawk.

Delhi-ah zan lam curfew puang

Delhi sorkar chuan khawpui chhungah hri kai an pun belh zel avangin nizan aṭang khan zan lam curfew a puang. Zan dar 10 aṭanga a tuk zing dar 5 thleng curfew hi puan a ni a, tun thla chhung a huam ang.

Chief minister Arvind Kejriwal chuan Delhi-a hri leng thawh lina a thleng mek niin a lo sawi tawh a, hri darh tur venna atan hma lak ni mah se, lockdown erawh puan a ni rih dawn lo tih a sawi. Kejriwal chuan, "Tuna kan dinhmun thlirin lockdown puan chu kan la ngaihtuah rih lo. Kan dinhmunte uluk takin kan thlir ang a, mipui ngaihdante kan lak hnuah lockdown puan chungchang chu kan la ngaihtuah chauh ang," a ti.

Delhi-ah hian Thawhṭanni khan hri kai thar mi 3,548 awmin, mi 15 in an thihpui bawk. Maharashtra chuan hri leng vangin tun thla chhung atan Zirtawpni zan dar 8 aṭanga Thawhṭanni zing dar 7 thleng lockdown a lo puang tawh a, Rajasthan pawhin zan dar 8 aṭanga a tuk zing dar 6 thleng curfew a puang tawh bawk.