Lok Sabha election : Vawiinah constituency 117-ah inthlan thawh thumna nei dawn
Lok Sabha inthlan thawh thumna chu vawiin hian state 13 leh union territory 2-a constituency 117-ah neih a ni dawn.
Inthlan neihna tur state te hi - Gujarat (26), Kerala (20), Maharashtra (14), Karnataka (14), Uttar Pradesh (10), Chhattisgarh (7), Odisha (6), Bihar (5), West Bengal (5), Assam (4), Goa (2), Dadra and Nagar Haveli (1) leh Daman and Diu (1), Jammu and Kashmir (1) leh Tripura (1) a ni.
Lok Sabha constituency 117-a inthlan neihna turah hian candidate 1,612 an awm. Candidate zinga 316 hi national party ami niin, state party aṭangin candidate 76, registered unrecognised party aṭangin 496 leh indenpedent candidate 724 an awm a ni. Candidate zinga 570 chu criminal case nei lai an ni.
Inthlan thawh thumna-a candidate zingah hian mi hausa tawntaw, crorepati 392 an awm a, an zinga hausa ber chu Uttar Pradesh-a Etah biala Samajawadi Party candidate Ku. Devendra Singh Yadav niin cheng vaibelchhe 204 a nei. BJP candidate te sum neih zat chu chawhrualin Rs vaibelchhe 13.01 a ni a, INC candidate te sum neih chawhrual chu Rs vaibelchhe 10.96 a ni thung. BSP candidate-te sum neih chu Rs vaibelchhe 1.22 anga chawhrual a ni bawk.
Candidate zingah 681 chu zirna lamah graduate leh a chunglam an ni a, 788 chu Class 5 - 12 inkar niin, 57 chu ziak leh chhiar thiam ti chauha inziak an ni a, hetihlai hian candidate zingah ziak leh chhiar thiam lo 23 an awm bawk.
Candidate 1,612 zingah 562 chu kum 25-40 inkar an ni a, 766 chu kum 41-60 inkar niin, kum 61-80 inkar candidate 267 an awm a, kum 80 chunglam 3 an awm bawk. Candidate 4 chuan an kum zat an ziak lang lo. Inthlan thawh thumna neih tura candidate zingah hian hmeichhia 142 an tel.
Maharashtra
Maharashtra-a Lok Sabha bial 14-ah inthlan thawh thumna hi neih a ni dawn a, BJP-Shiv Sena thawkdun leh Congress-NCP ṭangdunte chu inbei tawk hle tura rin an ni. Bial 14-ah hian candidate 249 an awm. Inthlan neihna turah hian polling centre tinah venhimna khauh taka kalpui niin, state border-te pawh khar a ni.
Karnataka
Lok Sabha inthlan thawh thumna hi Karnataka Lok Sabha seat 28 zinga 14-ah neih a ni dawn. Bial 14-ah hian candidate 237 an awm a, vote nei vaibelchhe 2.43 an awm bawk.
Uttar Pradesh
Uttar Pradesh-a Lok Sabha seat 80 zinga seat 10-ah vawiin hian inthlan hi neih a ni dawn. Candidate 120 an awm a, an zingah hian hmeichhia 14 an tel. Vote nei mi vaibelchhe 1.76 an awm bawk. Inthlanna felfai taka kalpui a nih theih nan venhimna uluk taka neih a ni a, inter-state leh inter-district border-te pawh khar vek an ni.
Gujarat
Gujarat-a Lok Sabha seat awm zawng zawng, seat 26-ah vawiin hian inthlan hi neih a ni dawn. Hemi rual hian assembly seat pali-ah by-election neih a ni nghal ang. Lok Sabha inthlan turah hian candidate 371 an awm a, vote nei vaibelchhe 4.41 an awm. Vote thlakna tur hian polling station 51,000 chuang siam a ni. MP candidate zingah hian BJP president Amit Shah, Union minister hlui Mansukh Vasava leh Mohan Kundariya te pawh an tel a ni.
Chhattisgarh
Chhattisgarh-ah chuan vawiin hian bial 7-ah inthlan neih niin, Lok Sabha inthlan hi an zo tawh dawn a ni. Candidate 123 an awm.
Odisha
Odisha-ah chuan vawiin hian Lok Sabha seat paruk-ah inthlan neih a nih rualin assembly seat 42-ah inthlan an nei tel nghal dawn a ni. Lok Sabha seat parukah hian candidate 61 an awm a, an zingah hmeichhia paruk an tel. Assembly seat 42-ah candidate 417 awmin hmeichhe candidate 38 an awm tel a ni. Odisha hian Lok Sabha seat 21 leh assembly seat 147 a nei. Vawiina inthlan neih turah hian vote nei mi 92,56,922 an awm.
Bihar
Bihar-a bial panga-a inthlan neih turah hian candidate 32 awmin an zingah hmeichhia panga an tel. Vote nei mi nuai 89 an awm a, polling station 9,076 an siam a, heng zinga 3,299 chu critical-ah puan a ni. Inthlan neihna hmuna venhim hna thawk turin police 57,000 chuang dah an ni a, polling staff 58,000 an awm bawk.
West Bengal
Lok Sabha seat 42 awmna, West Bengal-a seat panga-ah vawiin hian vote thlak a ni dawn. Seat panga-ah hian candidate 61 an awm a, vote nei mi 8,023,852 an awm a ni. Election Commission chuan bial panga-ah hian venhim hna thawk turin central force company 324 an dah. Polling booth 8,528 siam niin a ṭum khatna atan polling booth tinah VVPAT hman tel a ni dawn.
Assam
Assam seat 4-a inthlan neih turah candidate 54 awmin vote nei nuai 75 an awm. Gauhati bial bikah candidate 17 zet an awm a ni. Polling station 9,577 siam a ni a, heng zinga 147 chu all women polling station a ni.
Goa
Goa Lok Sabha seat pahnihah vawiin hian inthlanna neih a ni dawn a, hemi rual hian assembly bial pathumah by-election neih a ni nghal ang. Lok Sabha inthlan turah hian candidate 12 an awm a, assembly by-election neih turah candidate 18 an awm bawk. BJP leh Congress party chu inbei tawk hle tura rin an ni. Vote thlakna tur hian polling booth 1,600 chuang siam a ni.
Dadra and Nagar Haveli
Dadra and Nagar Haveli hi ramchhunga Lok Sabha constituency te ber zinga mi niin, vote nei nuai 2 vel awrh an awm. Vawiina inthlan neih turah hian candidate 11 an awm. Kum 2011 census-ah khan Dadara and Nagar Havel-ah hian mi 3,43,709 an cheng a, an zinga 51.95% hi Scheduled Tribe an ni.
Kerala
Kerala-a bial 20-ah inthlan neih a ni dawn a, candidate 227 awmin an zingah hian Wayanad biala ding Congress president Rahul Gandhi pawh a tel. Hmeichhe candidate 23 an awm tel bawk. Vote nei mi 2,61,51,534 awmin vote thlakna tur polling station 24,970 siam a ni a, polling booth tinah Braille ballot paper pahnih zel dah tel a ni. Inthlan buaipui tur hian mi 1,01,140 zet dah an ni a, an zingah hian sectoral officer 1,670 leh presiding officer 33,710 an tel a ni.
Daman and Diu
Daman and Diu-in Lok Sabha seat khat a neihah vawiin hian vote thlak a ni dawn a, vote nei hi mi nuai 1.21 vel an ni. He bialah hian BJP candidate Lalubhai Patel leh Congress candiate Ketan Patel te an inbitum dawn a ni. An pahnih hian kum 2014 Lok Sabha inthlanah khan an lo inkhing tawh bawk a, BJP candidate Lalubhai Patel hi a chak a ni.
Jammu and Kashmir
J&K-a Anantnag parliamentary constituency-ah vawiin hian vote thlak a ni dawn a, he bial hian district pali a huam a ni. Security lam venthawn thil avangin he bial chhungah hian thawh thumin vote thlak a ni dawn a, vawiinah Anantnag district-ah vote thlak niin April 29-ah Kulgam district-ah vote thlak a ni dawn a, May 6-ah Pulwama leh Shopian district-ah vote thlak a ni thung ang. Candidate 18 awmin vote nei mi maktaduai 13.93 an awm a ni. Candidate zingah hian chief minister hlui Mehbooba Mufti pawh a tel.
Tripura
Tripura East seat constituency-ah vawiin hian Lok Sabha inthlan neih a ni dawn a, hei hi Tripura-in kumin Lok Sabha inthlan an zawhna tur a ni tawh ang.Tripura East-ah hian candidate 10 an awm a, hmeichhia pahnih an awm bawk. He bial hi April 18-a inthlan thawh hnihna neih tur zingah telh ni mah se tharum thawhna a thlen hlauhthawn thil avangin vote thlak hun hi vawiin atan hian sawn sak an ni.