Gujarat intualvuakna tuartu Bano-i hnenah Rs nuai 50 pe turin hriattir

Supreme Court chuan kum 2002-a Gujarat-a intualvuakna tuartu leh pawngsual rawn tawktu, Bilkis Bano-i chu zángnadawmna pawisa faiin cheng nuai 50, sorkar hna leh chenna in pe turin Gujarat sorkar a hriattir.

Chief Justice Rajan Gogoi-a kaih­hruai bench chuan he hriattirna hi tichhuakin, he thubuaia thil dik lo titu official-te chungah action lak a nih thu a sawi bawk. Bench chuan official, thil ti dik lote hamṭhatna dawn chu tihtawp sak an ni a, hei bakah hian Bombay High Court-in thiam loh a lo chantir tawh, IPS office pawh a rank tih hniamsak a ni tih state counsel-in a hriattir tih a sawi.

Kum 2008 January 21 khan special court chuan Godhra-a intualvuakna thleng kaihhnawihah Bano pawngsual rawn leh a chhungte pasarih thata puh mi 11-te chu thiam loh chantirin damchhung tang turin a lo hrem tawh a ni. Hetihlai hian he pawikhawihna thlenga inhnamhnawiha puh mi pasarih erawh chu thiam a chantir thung.

Muslim te tualvuakna thlen ṭum hian Bano-i hi kum 21 mi niin fa, thla nga mi a pai mek a, a fate pathum thah­sak an ni bawk. Gujarat sorkar chuan zángnadawmna cheng nuai 5 pek a tum a, mahse hei hi duh loin Supreme Court-ah a thlen a ni.