Rafale case chungchanga a thusawi vangin Rahul Gandhi hnenah notice pe
Supreme Court chuan nimin khan Congress party president Rahul Gandhi chu Rafale case chungchanga a thusawi avangin contempt notice a pe a, April 30-ah hemi chungchang hi a ngaihtuah dawn.
Court chuan he case chungchanga court ngaihdan ni anga Rahul Gandhi-a thusawi te hi a dik lo tih a sawi a, April 30-ah Rafale case-a court thutlukna siam ennawn tura ngenna, petition thehluhte a ngaihtuah rualin Gandhi chungchang pawh hi a ngaihtuah dawn tih a sawi. Hei bakah hian Gandhi-an BJP MP Meenakshi Lekhi-in a laka criminal contempt petition a thehluh titawp tura a ngenna pawh a hnawlsak bawk.
Rahul Gandhi-a counsel Abhishek Manu Singhvi chuan a client hian a thusawi chungchangah thupha a chawi tawh tih a sawi.
Nimin khan Delhi court chuan kum 2016-ah Rahul Gandhi-an PM Modi chungchang a sawi dana complaint thehluh chu special court-a ngaihtuah turin a transfer. District Judge Poonam A Bamab chuan he case hi Additional Chief Metropolitan Magistrate Samar Vishal-a hnenah a transfer a, April 26-ah ngaihtuah a ni ang. Rahul Gandhi hian kum 2016-a thu a sawiah, PM Modi chu sipaite thisen phena biru a, ram tana an inpekna te lo hlawkpui tumah a puh nia sawi a ni.