Covid-19 vangin hmaituamna indaih lohna nasa

India ramah Covid-19 a darh chhoh zel avangin hand sanitizer (kut silna), mask (hmaituamna) leh dettol indaih lohna a nasa chho nghal hle.

 

Hri leng mek laka invenna tur atana ṭangkai nia sawi, hmaituamna leh kut silna lei duh an tam tak em avangin a man pawh a san chak phah hle. A zuartu lam pawhin duhtu an tam avangin a man hi ṭum eng emaw zat an tisang tawh a ni.  E-commerce website ṭhenkhat chuan an stock neih sate pawh a zo tawh a, hralhchhuah tur an nei tawh lo tih an sawi. 

India hmarchhak lamah pawh indaih lohna hi a sang chho zel. Assam-a pharmaceutical company-te chuan kar liam ta khan inven lawkna tur atana mithiamte sawi, hand sanitizer leh hmaituamna an hralh chhuah hi a tam hle a, northeast-a pharmaceutical company head Dipesh Kar chuan kut silna hi stock pawh an neih tawh loh thu a sawi. Hmarchhak bial chauh ni loin ramchhung hmun dangah pawh hmaituamna leh kut silna an hralh chhuak chak hle. 

India-ah Covid-19 kai mi 43 awm 

Nimin khan Kerala-ah mipa naupang kum thum mi chu Covid-19 a kai tih hriat a ni a, pathianni khan he state-ah vek hian mi panga chuan he hri hi an kai tih hriatchhuah a ni bawk.  Heng mite bakah Delhi, Uttar Pradesh leh Jammu-ah hri kai thar hi hmuh an ni bawk a, heng mite nen hian nimin thleng khan India ramah Covid-19 kai hi mi 43 an awm tawh a ni. 

Union health minister Dr Harsh Vardhan chuan nimin khan Delhi chief minister Arvind Kejriwal leh Delhi governor Anik Baijal te chu meeting neihpuiin, hri leng mek chungchanga hma lak dan turte a sawipui. Delhi CM Kerjrieal chuan mipuite chu chiai mai lo tura chahin, "Hmaituamna pawh mi hrisel pangngai tan hman kher a ngai lo," tiin a sawi. Kut silna atan pawh hand sanitizer a awm loh pawhin, tui leh sahbawn nena fai taka sil chu a ṭhat dan a in ang tih a sawi bawk.