JD(U) hruaitu Binod Choudhary fanuin Bihar inthlanah CM candidate nih a tum

Janata Dal (United) (JD(U)) MLC hlui Vinod Choudhary-a fanu Pushpam Priya Choudhary chuan kumin kum tawpa an state-in inthlan an neih turah  chief minister candidate nih a tum thu a twitter-ah a ziak.

London-a khawsak mek, Priya hian Pathiannia 'International Women’s Day' hman tak pual khan a twitter-ah Bihar Legislative Assembly election neih tur atan CM candidate a nih tur thu leh Plural party vote turin mipuite a ngen nghal.

"Bihar chuan kalna lam dika ke pen dan kawhhmuhtu tur a mamawh a, Bihar chuan inthlak a mawmawh tawh tak zet a, a chhan chu Bihar hian thil ṭha ber neih a phu a ni. Politics hmanga inchirh thehna chu hnawl ngamin, kan state hi hmangaih ila, Bihar-a party ṭhang duang ber Plural party chu i thlawp tlang ang u," tiin Priya chuan chuan a sawi. 

Plurals hi political party a nih loh thu tarlangin political revolution a nih thu a tarlang thung. He Plurals thil tum ber chu mi zawng zawngin hlutna an nei tih hriat tir leh thil ṭha ber chu an phu a ni tih hriattir a ni. 

Bihar-ah hian JDU leh NDA ṭangkawp sorkarin thuneihna an chang mek a, eptu lian ber chu RJD leh UPA ṭangkawp an ni. Anni bawk hi mi tam tak chuan inkhing leh tura an ngaih ber a la ni bawk. Kumin October tlaah inthlanna hi neih tum a ni a, Legislative Assembly seat 243 an inchuah ang. Inthlana chak tur chuan seat 122 lak a ngai a ni.