Delhi CM leh Dy CM lakah Non-bailable warrant tichhuak

Delhi court chuan Chief Minister Arvind Kejriwal, Deputy Chief Minister Manish Sisodia leh Swaraj India president Yogendra Yadav-te chu an laka complaint thehluh chungchangah court-a an inlan loh avangin an lakah non-bailable warrant a tichhuak.

Additional Chief Metropolitan Magistrate Samar Visah chuan AAP hruaitu Kejriwal leh Sisodia bakah AAP hruaitu hlui Yadav te manna tur thupek hi tichhuakin, advocate Surender Kumar Sharma-a'n an laka complaint a thehluh chungchang ngaihtuahnaah an pathum hian an inlan lo tih a sawi.

Sharma hian complaint a thehluhah kum 2013 khan AAP volunteer-te chuan Delhi Assembly election-ah an party ticket-a chuh turin an sawm a, a hnathawh danah Kejriwal chu a lawm hle niin an hrilh tih a sawi. Sisodia leh Yadav-te hian AAP Political Affairs Committee-in ticket pek an remtih thu an hrilh hnuah inthlana chuh tumin application form pawh a thehlut a, mahse a hnuah a dilna hi hnawlsak a ni leh si niin a sawi a ni. Hei hian Bar leh Society lamah a hmingṭhatna lo neih tawhte a tihchhiat phah a ni, a ti.