CJI puhna thubuaiah SC-in Delhi Police, CBI leh IB hotute a ko

Mipat hmeichhiat lam hawia mawi lo taka chea Chief Jus­tice of India Ranjan Gogoi puh a nihna chu amah tihchhiat tuma phiarrukna nia sawi a ni a, hei vang hian nimin khan Supreme Court chuan CBI director, Delhi police commissioner leh Intelligence Bureau director te chu hma lak dan tur sawiho turin court-ah a ko.

Jutices Arun Mishra, RF Nariman leh Deepak Gupta awmna special bench chuan sawihona an neih turah top officer pathumte hi tel vek turin an ti a ni. Bench chuan CJI dik lo taka puh a nih chungchangah hian corporate person leh midangte pawh an inrawlh niin a sawi a, he thil hi ngaihzam mai chi a ni lo a, chhui chian ngei a ngai tih a sawi.

CJI Gogoi laka 'sexual harassment' case thehlut tura mi pakhat, 'Ajay' intiin cheng vaibelchhe 1.5 pek a tiam thu ad­vocate Utsav Singh Bains chuan a lo sawi tawh a, hemi chungchangah hian special bench chuan notice a pe tawh bawk.

April 20 khan Su­preme Court-a thawk ṭhin, hmeichhe pakhat chuan CJI hi a lak­ah mipat hmeichhiat lam hawia mawi lo taka cheah a puh a, hei hi online lamah thehdarh zui a ni. He hmeichhia hi Delhi-a Gogoi-a home office-a thawk ṭhin a ni. Affidavit a thehluhah nikum October thlaa CJI atana Gogoi ruat a nih hnuah a chungah mawi lo taka a chet thu a sawi. Hemi chungchang hi a sawichhuah avangin a hna aṭangin ban a ni tih a sawi bawk. He thil thlen hnu hian a pasal leh a pasal unaupa, head constable ve ve te chu kum 2012-a criminal case chinfel vek tawh kaihhnawihah suspend an ni zui bawk niin a sawi a ni.

CJI chuan hetianga an puhna hi mak a tih hle tih sawiin, hemi phenah hian amah tihchhiat tuma phiarrukna nasa zawk a awm niin a sawi. An puhna lakah chuan insawithiam pawh a tum duh lo tih a sawi a, CJI office tihchhiat duh an awm a ni, a ti.