Navy Chief atana Karambir Singh ruatna khing let

Vice Admiral Bimal Verma chuan Chief of Naval Staff thar atana Vice Admiral Karambir Singh ruat a nih chungchang chu Thawhlehni khan military court-ah a khing. Hemi hma hian defence ministry-ah complaint a lo thehlut tawh bawk a, mahse hei hi ministry lam chuan an chhang lo.

Andaman and Nicobar Command-a commander-in-chief Verma hian April 8 khan Armed Forces Tribunal (AFT)-ah Navy hotu thar ruat dan chungchangah petition a lo thehlut tawh a, mahse tribunal hian Navy chhung lamah an buaina chinfel dan zawng hmasa phawt tura a tih hnuah a petition hi a hnukdawk leh a ni.

Naval commander zingah Verma hi a senior ber a, mahse sorkar chuan Navy hotu lu ber atan a junior Vice Admiral Singh hi a dah zawk a, May 30-a chawl tur Admiral Sunil Lanba a thlak ang. Hei vang hian Verma hi a lungawi lo a, navy hotu thar ruat a nih dan hi a khing ta a ni.

Petition a thehluhah Verma chuan navy hotu thar ruat a nihnaah commander senior ber kalkan a nih dan chu a zawt a ni. Hetihlai hian sorkar chuan Navy hotu tur ruatnaah hian tihdan phunga lo neih ṭhin, officer senior ber dah ṭhin chu hmang loin, merit-based zawk an hmang niin a sawi.