PM Modi-a MCC palzuta puhna chhui chiang dawn
Congress Party-in Prime Minister Narendra Modi-a chu Thawhlehni-a Lok Sabha inthlan thawh thumna neihnaa vote a thlak zawh hnuah model code of conduct palzutin road show neiin a campaign zui nghal nia an puhna chu chhui chiang turin inquiry order tihchhuah a ni.
PM Modi hi Thawhlehni zing khan Ahmedabad-a Ranip area-ah polling centre-a a vote thlak tur chu jeep-in a kal a, a kalna turah hian mipuite chu kawngsir tawn tawnah an lo intlar a ni. Vote a thlak hnuah polling centre aṭanga kalsawnin media mite a be zui a ni.
Congress party chuan Election Commission hnenah PM Modi hian vote a thlak hnuah road show a nei zui a, MCC palzut zawngin thu a sawi niin an puh a, dan a bawhchhiat vang hian ni 2-3 chhung chu campaign khapsak turin an phut tih an sawi a ni. Eptu party hian BJP president Amit Shah-a'n MCC a bawhchhiat thu pawh an thlen bawk.
Gujarat Chief Electoral Officer S Murali Krishna chuan PM puhna chungchang hi Ahmedabad district election officer hnenah chhui chiang tura hriattir a nih thu a sawi.