AAP-in election manifesto tlangzarh

Aam Aadmi Party (AAP) chuan nimin khan an party election manifesto an tlangzarh.

Delhi Chief Minister leh Aam Aadmi Party (AAP) convener Arvind Kejriwal-a chuan Lok Sabha inthlanpui neih mekah Modi-Shah ten thuneihna an chan leh tur danna turin an party chuan theihtawp a chhuah dawn a, sakhaw tihbik nei lo eng pawl pawh an thlawp thei dawn tih a sawi.

Party election manifesto a tlangzarh hnua chanchinbu mite a kawmnaah, Kejriwal-a chuan AAP in a dah pawimawh ber chu Delhi tana state puitling neih a ni, a ti. "State puitlinga Delhi hlankai a nih theihna atan hian kan bei zel dawn a ni", a ti. Manifesto tlangzarh inkhawmah hian Deputy CM Manish Sisodia, Gopal Rai, Sanjay Sinha leh party hruaitu dangte an tel.

Kejriwal-a chuan BJP president Amit Shah-an Hindu, Sikh leh Budddhist ni lo India rama rawn lutte dahbo an nih tur chungchang a sawi chu sawichhuakin, "He thil hian BJP-in heng sakhaw pathum tih loh sakhaw dangte dahbo vek a tum zia a tichiang hle a ni", tiin a sawi.

Delhi CM chuan Delhi-a Congress party nena thawhdun an tumna a hlawhchham chung changah Congress president Rahul Gandhi a bei zui bawk. "Rahul Gandhi hnenah hian Twitter aṭangin eng ṭangrual pawl nge siam theih tih ka zawt duh a ni. Modi leh Shah te hian thuneihna an chang leh a nih ngat chu Gandhi chu a mawhphurtu a ni ngei ang", a ti.

India ram inpumkhatna chu BJP chuan dinhmun der­thawngah a dah mek tih sawiin, inthlanpui neih mek hmang hian India ram chu chhanhim leh theih a nih thu a sawi. "Shah-Modi thawkdunte dang tur hian kan theihtawp kan chhuah dawn a ni. An tel lohna ṭangrual sorkar chu kan thlawp zel ang. 2019 inthlanpui hi ram leh Constitution chhanhimna tur hun a ni. Indian kan ni hmasa a, a dawtah Hindu, Muslim leh a dangte kan ni zawk", tiin a sawi.

AAP manifesto-ah hian Delhi chu state puitlinga hlankai a nih theih dan tur kimchang leh, state puitling a nih huna hma lakna tur hrang hrangte tarlan a ni. Delhi sorkar chuan a hna thawh tur hrang hrangah sorkar laipui aṭanga phalna a lak zel a ngai a, BJP kaihhruai NDA sorkar chuan hna an thawhna kawng hrang hrangah harsatna a siamsak fo tih te an sawilang a ni. An harsatna hrang hrang neihte sutkianna tur chuan state puitling an nih phawt a ngai tih sawiin, sorkar agency hrang hrangte chu mipuite an aiawh tura an thlan sorkar hnuaiah a awm tur a ni, a ti. State puitling an nih chuan Delhi mipuite duhthusam tam tak chu tihhlawhtlin theih nghal a ni dawn tih an sawi a ni.