BJP-in Congress aiin candidate dah hnem zawk

Centre-a rorellai Bharatiya Janata Party (BJP) chuan kumin Lok Sabha inthlanpuiah Congress aiin candidate a dah hnem zawk a, hei hi kum 1980-a Jana Sangh aṭanga BJP dinthar a nih hnuah Lok Sabha inthlana a chuh tam ber ṭum leh, Congress aia seat a chuh tam zawk ṭum khatna a ni.

BJP hian Lok Sabha seat 545-a inthlanna neih tura hian can­didate 437 a nei a, Congress in candidate 423 a nei thung. BJP hian Andhra Pradesh leh Telangana-ah thawhpui a nei dawn lo a, heng state pahniha Lok Sabha seat awm zawng zawng seat 42-ah party malin a chuh vek dawn a ni. Congress hruaitute chuan state eng emaw zatah thawhpui an neih avangin an party hminga seat an chuh zat hi a tlem niin an sawi.

Kum 2014 inthlanpuiah khan BJP chuan seat 428-ah chuhin heng zinga seat 282-ah hian hnehna a chang. Hemi kuma inthlanah hian Congress chuan seat 464 a chuh aṭangin seat 44 chauh a la a, kum 1996 hnu lamah seat a chuh hnem ber ṭum a ni.

Kum 2009-ah khan BJP chuan seat 433-ah chuhin Congress-in 440-ah a chuh thung. Hemi kum hian BJP chuan seat 116 a la a, Congress-in seat 206 lain a thawhpui party dangte nen UPA sorkar an siam a ni.