Varanasi bialah Priyanka Gandhi ding dawn lo
Congress general secretary Priyanka Gandhi Vadra chu Lok Sabha inthlan turah Uttar Pradesh-a Varanasi bialah Prime Minister Narendra Modi a khing dawn tia sawi thawm awm mah se, Congress party chuan nimin khan Modi-a khing tur hian Ajay Rai a ruat ta zawk.
Kum 2014 Lok Sabha inthlanah khan Rai hi Varanasi bialah a lo ding tawh bawk a, mahse Modi leh Kejriwal-te hnuaiah a awm a ni. PM Modi hian 2014 inthlanah he biala vote aṭanga a zahve aia tam hmuin, vote nuai 3.37 zetin amah hnaih bertu Kejriwal-a chu a hneh a ni.
Varanasi bialah hian Congress candidate-ah Priyanka Gandhi dah a ni dawn tih thawm a awm a, amah Priyanka ngei pawhin an party-in ti tura an duh ang chu a zawm mai tur thu pawh a lo sawi tawh bawk.
Prime Minister Narendra Modi chuan vawiin hian Varanasi biala chuh turin nomination a file dawn. Modi hian nimin khan Bihar-a Darbhanga-ah roadshow a nei a, hemi hnu hian UP-a Banda-ah rally nei turin a kal leh a, vawiin hian Varanasi a pan dawn a ni. Nomination a file hmain roadshow a nei leh dawn bawk a ni.