Varanasi biala ding turin Modi-an nomination thehlut

Prime Minister Narendra Modi-a chuan a bial ngai, Uttar Pradesh-a Varanasi bialah Lok Sabha inthlan chuh turin nimin khan nomination paper a thehlut.

Varanasi-ah hian Lok Sabha inthlan thawh hnuhnung ber, a thawh sarihna, May 19 hian inthlanna hi neih a ni ang.

Collectorate office-a nomination paper a thehluhnaah hian PM Modi hi BJP president Amit Shah, Union Home Minister Rajnath Singh leh External Affairs Minister Sushma Swaraj, NDA hruaitute - Bihar Chief Minister Nitish Kumar, SAD leader Prakash Singh Badal leh Shiv Sena chief Uddhav Thackeray ten an ṭawiawm a ni.

Nomination paper a thehluh hmain Modi hian Kaal Bhairav temple tlawhin a ṭawngṭai hmasa a, hemi hnu hian Collectorate office lam panin road show a nei zui a ni. Kawng lakah mi tam takin an lo hmuak bawk.

Kum 2014 Lok Sabha inthlanah khan Varanasi bialah hian Modi chuan amah hnaih bertu, Aam Aadmi Party (AAP) hotu Arvind Kejriwal-a chu vote nuai thum chuang zetin a hneh a ni.

Telangana state-a loneitute chuan sorkar laipuiin an harsatna tawhte a ngaihsak tawk loh avangin Varanasi bialah PM Modi hi khin an tum tih an lo sawi tawh a, nimin khan Telangana-a Nizamabad-a loneitu 50 vel chuan nomination thehlut turin Varanasi hi an pan. Loneitu pawl hotu, Ganga Reddy chuan midang pawh an la kal belh dawn niin a sawi.

Varanasi biala candidate tam tham tak dah an tum chhan chu sorkar laipui leh political party dangte hnena an harsatna tawh mek hrilh hriatna tur a ni tih a sawi a, political party zawm an nei lo tih a sawi bawk.