Hri kai thar nuai khat chuang awm leh
India ramah Thawhlehni khan Covid-19 hri kai thar mi 1,15,736 awm lehin, hripui len hnuah ni khata hri kai thar tam ber ni a thleng leh.
Union health ministry-in a tarlan danin, Thawhlehni thlenga hri kai hmuh chhuah tawh hi mi 1,28,01,785 an tling tawh a ni. Hemi ni hian hripui vanga thi mi 630 an awm belh leh bawk.
Mahnia motor chuang pawh mask vuah turin ti
Delhi High Court chuan hri leng laka invenna turin face mask chu vuah ngei ngei tur a ni tiin, private motor-a khalhtu, mahni chauha motor chuang pawhin mask hi a vuah zel tur a ni, a ti.
High Court chuan face mask chu Covid-19 hri darh tur venna pakhat a ni tiin, Delhi sorkarin private motor khalh, mahni chauha motor-a chuang mask vuah lote sum a chawi tir chungchangah pawh inrawlh a tum lo tih a sawi. Car-ah mi pakhat chauh pawh chuang se, public space a ni tho a ni, tiin mask vuah reng a ṭul tih a tarlang.
Maha sorkarin state dang aṭanga oxygen supply tir turin ngen
Ram chhunga hri kai tamna leh thihpui tamna ber state, Maharashtra-ah chuan hri kai thar an pun chak avangin sorkar laipui hnenah state dang aṭanga oxygen supply tir turin a ngen.
Maharashtra health minister Rajesh Tope chuan hri kai enkawl tur an pung chak a, hei vang hian oxygen mamawh a sang hle tih a sawi. "State chhung aṭangin oxygen hi nitin metric ton 12 siam chhuah niin, ton 7 chuang hman ziah a ni bawk. Kan hnaivai state aṭangin oxygen hi supply tir turin sorkar laipui hnenah kan ngen a ni. Kan mamawhna hi a sang zel a nih chuan medical lam a nghawng lohna turin industry ṭhenkhat chu kan khartir mai a ngai dawn a ni," a ti.
Mumbai, Palghar leh hmun danga oxygen plant siamna tura rawtna pawh state sorkar chuan chak zawka hma lak dan tur a ngaihtuah mek thu minister chuan a sawi.
Gujarat HC-in lockdown puan a rawt
Gujarat High Court chuan an state-a hri kai an pun chak leh avangin state sorkar chu hma la thuai tura tiin, hri darh zel venna atan ni 3-4 chhung chu state pumah lockdown puan a rawt.
Chief justice Vikram Nath leh justice BD Karia awmna bench chuan state sorkar hnuaia law officer-te hnenah court-in hri dona kawnga hma lak a duh dan chu sorkarah thlen thuai turin a hrilh. Sorkarin hma a lak thuai loh chuan hri leng chu an thunun theih lohin a awm mai dawn tih an sawi.
Chief justice chuan state chhung dinhmun thlirin ni 3-4 chhung lockdown puan chu a ṭul tawh dawn nia a lan thu sawiin, hei hian hri darh tur venna lamah a puih thei tur thu a sawi a ni.