Naxal helhoin CRPF commando an kawl tih an sawi

Chhatisgarh-a Bijapur district-a Naxal hel pawlin security force-te an ambush hnua chin hriat loha awm, CRPF sipai pakhat chu helho hian an kutah a awm mek tih sawiin, a thlalak pawh an tichhuak a ni.

Kar liam ta Inrinni, April 3-a Bijapur-Sukma border-a Naxal hel leh security force-te inbeihnaah khan sipai 22 an thi a, chin hriat lohin CoBRA jawan Rakeshwar Singh Manas chu a awm a, sipai 31 in hliam an tuar bawk a ni.

Naxal ho hian nimin khan thuchhuah siamin, CRPF commando chu an kutah a awm mek thu leh, chhuah a nih theihna tura inbiakna neihpuitu tur ruat turin sorkar an phut. Sorkarin palai atana a ruat hming chu a puan hnuah an mi hren chu police-te kutah him taka an hlan tur thu an sawi bawk.

Thuchhuah an siamah hian helpawl chuan security force-te nena an inbeihnaah khan silai 14 bakah a mu 2,000 chuang leh inbiakpawhna hmanruate an la tih an sawi. He inbeihnaah hian pawl mi leh sa pali an thi tel a, an ruang erawh an hlawm thei lo tih an sawi bawk a ni.

Maoist-ten Manas an kawl thu an sawi hma lawk hian, CRPF director general Kuldiep Singh chuan inbeihna thlen lai hian Manas hi a damsak vak lo a, a lo ṭhu chawl niin a sawi.