India-ah sipai ralthuam tam zawk siam tum a ni: Russia

Russia foreign minister Sergei Lavrov chuan Thawhlehni khan India ramah Russia sipai ralthuam tam zawk siam tum a nih thu leh hemi atan hian Russia leh India chuan inbiakna an nei mek tih a sawi.

India foreign minister Subrahmanyam Jaishankar nena New Delhi-a thuthar thehdarhtute an kawmnaah Thawhlehni khan Sergei Lavrov chuan hemi chungchang hi a sawi a, eng ralthuam chiah nge India rama siam an tum erawh a sawi lang lo.

Ram pahnih official-te chuan kum eng emaw zat chhung chu Russia sipai helicopter India rama siam dan tur chungchang an sawi duh tawh tih an sawi thung.

India chuan Russian MiG fighter plane leh Su-30 jet-te chu license nei thlapin a lo siam tawh a, ram pahnihte hi supersonic BrahMos cruise missile India rama siamna turin an thawkdun tawh bawk.

Sergei Lavrov chuan Russia leh China sipai thawhdunna a awm nia thuthang awm chu a dik lo tih sawiin Russia leh China Summit an neih hnuhnun berah pawh ram pahnih chuan inkungkaihna ṭha tak tunhma aṭangin nei tawh mah se sipai lamah erawh thawhdunna an neih lo tih a sawi a ni.

Russian Foreign Minister hi Thawhṭanni khan India ramah a rawn thleng a, External Affairs Minister S Jaishankar nen inkawmna an neih bakah hian Prime minister Narendra Modi pawh a be bawk.

India ram a tlawh hnu hian Thawhlehniah vek khan Pakistan-ah a zin leh nghal a, Pakistan foreign minister Shah Mahmood Qureshi leh an Prime minister Imran Khan-te chu inbiakna a neihpui leh a ni.