Vawiinah LS inthlan thawh 4-na State 9-a bial 72-ah inthlang dawn

Lok Sabha inthlan thawh li-na chu vawiin hian state pakuaa constituency 72-ah neih a ni dawn. Candidate 961 awmin vote nei vai­belchhe 12.79 an awm.

Bihar, Jammu & Kash­mir, Jharkhand, Madhya Pradesh, Maharashtra, Odisha, Rajasthan, Uttar Pradesh leh West Bengal-ahte inthlan hi neih a ni ang.

Kum 2014 Lok Sabha inthlanah khan vawiina inthlanna neihna tur bial 72-ah hian BJP chuan seat 45 an la a, Shiv Sena-in seat 9, Lok Janshakti Party-in seat hnih leh Congress in seat hnih an la. BJD in seat ruk, Trinamool Congress-in seat ruk leh Samajwadi Party in seat khat an la bawk a ni.

Inthlan thawh li-naah hian candidate 961 an awm a, bial 37-a candidate zingah criminal case nei pathum aia tam an awm.

National Election Watch and Asso­ciation for Democratic Reforms (ADR) in candidate 961 zinga 928 te affidavit thehluhte a zirchian aṭangin an zinga 210 chu criminal case nei lai an ni a, heng zinga 158 te thubuai chu serious case niin 12 chu an thubuaia thiam loh chantir tawhte an ni. Hetihlai hian candidate ṭhenkhatte affidavit thehluh erawh a kim loh avangin an zirchiang thei lo thung.

BJP candidate 57 zinga 25 chu criminal case nei lai niin, Congress candidate 57 zinga 18 in thubuai an nei bawk a, Bahujan Samaj Party (BSP) candidate 54 zinga 11, Shiv Sena candidate 12 leh Independent candidate 345 te chuan criminal case an nei bawk.

Inthlan thawh li-na candidate te sum neih zat chu chawhrualin cheng vaibelchhe 4.53 a ni. Candidate zinga hausa ber chu Madhya Pradesh-a Congress candidate Nakul Nath niin, a hausakna hi cheng vaibelchhe 660 a ni. Party lian zingah BJP party candidate te sum neih zat chawhrual chu Rs vaibelchhe 13.63 a ni a, Congress candidate te sum neih zat chawhrual chu Rs vaibelchhe 29.03 niin, BSP candidate te sum neih chawhrual chu Rs vaibelchhe 2.69 a ni.

Maharashtra

Maharashtra-ah chuan inthlan thawh lina hi bial 17-ah neih a ni dawn a, candidate 323 an awm. Candidate zingah hian union minister nilai Subhash Bhamre, Congress hruaitu Milind Deora leh tun hnaia Congress party zawm thar, Bollywood star Urmila Matondkar te an tel.

Vote nei mi vaibelchhe 3.11 an awm a, polling station 33,314 siam a ni.

Kum 2014 Lok Sabha inthlanah khan heng seat 17 zinga seat 8 hi BJP in an la a, a bak seat 9 chu an thawhpui Shiv Sena ten an la thung. Hemi kum inthlanpuiah hian Congress party chuan Maharashtra state pumah Lok Sabha seat hnih chauh an la a ni. Maharashtra hian Lok Sabha seat 48 neiin, seat 80 neitu Uttar Pradesh dawta seat ngah ber a ni. April 11, 18 leh 23-te hian seat 31-ah inthlan hi an lo nei tawh a ni.

Uttar Pradesh

Uttar Pradesh-a Lok Sabha seat 80 awm zinga seat 13-ah vawiin hian inthlan thawh li-na hi neih a ni dawn a, zing dar 7 aṭanga tlai dar 6 thleng vote thlak theih a ni ang. Hemi rual hian Nighasan assembly by-election neih a ni bawk ang.

Lok Sabha seat 13-ah hian candidate 152 an awm a, assembly by-election-ah candidate 7 an awm bawk. Vote nei mi 2,38,88,367 an awm a, vote thlakna tur polling booth 27,513 siam a ni.

Inthlan neihna tur bial 13 zinga 12-ah hian kum 2014 Lok Sabha inthlanah khan BJP an chak a, tun ṭum inthlanah hian BJP leh BSP-SP ṭangdun chu inbei tawk hle tura ngaih an ni. Kheri bialah candidate tam berin 15 an awm a, bial pali-ah candidate 14 ṭheuh awmin, bial pahnih-ah candidate 13 ve ve an awm bawk. Candidate 11 awmna bial pahnih, candidate 10 awmna bial pakhat, 9 awmna bial pahnih leh candidate 5 awmna bial pakhat a awm. Vawiina inthlanna neih tura candidate zingah hian Samajadwadi Party president Akhilesh Yadav-a nupui Dimple Yadav te, union minister hlui Congress candidate Salman Khurshid, Congress senior leader Anu Tandon te an tel.

Odisha

Odisha-ah hian Lok Sabha bial paruk-ah inthlan neih a ni dawn a, hei hi Lok Sabha inthlan an neih tawpna tur a ni. Bial paruk-ah hian candidate 52 an awm. Lok Sabha inthlan neih rual hian assembly inthlan thawh lina chu constituency 41-ah neih a ni dawn bawk a, candidate 336 an awm. Patkura assembly seat-ah chuan BJP candidate a thih avangin May 19-ah inthlan neih a ni ang. Odisha hian Lok Sabha seat 21 leh Assembly seat 147 a nei a ni. Vote nei mi nuai 95.14 awmin vote thlakna tur polling station 10,792 siam a ni.

Bihar

Bihar-ah chuan Lok Sabha seat panga-ah inthlan thawh li-na hi neih a ni dawn a, Begusarai biala Left leh Right candidate-te chuan ngaihven a hlawh hle. He bialah hian CPI chuan JNU zirlai pawl hruaitu hlui Kanhaiya Kumar din tirin, BJP lamin an hruaitu Giriraj Singh an dah bawk. Bial panga-ah hian candidat 66 an awm.

Jammu & Kashmir

Jammu and Kashmir-a Anantnag Lok Sabha bialah inthlan hi neih a ni dawn. Security lam venthawn thil avangin Anantnag bialin a huam, district pali-ah inthlan hi thawh thumin neih a ni a, vawiin hian Kulgam district-ah vote thlak a ni ang. Vote nei mi nuai 3.45 an awm a ni.

Jharkhand

BJP sorkarna Jharkhand state hian tun ṭum Lok Sabha inthlan an neih hmasakna ber tur a ni a, bial pathumah an inthlang ang. Vote nei mi 45,26,693 awmin candidate 59 an awm a, an zingah hian Union Minister of State for Tribal Affairs Sudarshan Bhagat pawh a tel. Inthlan neihna bial zingah hian Bihar state nena an inrina bul, Naxal hluarna hmunte a tel avangin ramri pawh khar a ni. Zing dar 7 aṭang tlai dar 4 thleng vote thlak theih a ni ang.

Madhya Pradesh

Madhya Pradesh-a Lok Sabha seat paruk-ah inthlan neih a ni dawn a, hemi rual hian assembly bial pakhatah by-election neih a ni bawk ang.MP-ah hian Congress leh BJP chu inbei tawk hle tura rin an ni a, candidate zingah hian Congress ticket-a Chhindwara biala ding, Chief Minister Kamal Nath-a fapa Nakul Nath pawh a tel. Candidate 108 an awm a ni.

Rajasthan

Rajasthan-a Lok Sabha bial 13-a inthlan neih turah hian candidate 121 an awm a, vote nei vaibelchhe 2.57 awmin polling station 28,182 siam a ni. Kum 2014 inthlanpuiah khan vawiina vote thlakna bialah hian BJP an chak vek a ni. Tun ṭum inthlanah hian Chief Minister Ashok Gehlot-a fapa Vaibhav Gehlot chu a ṭum khatna atan dingin, Jodhpur bialah union minister Gajendra Singh Shekhawat a khing dawn a ni. BJP aṭanga Congress-a inlet, union minister hlui Jaswant Singh-a fapa, Manvendra Singh pawh a pa lo din tawhna bial, Barmer-ah a ding ve dawn bawk.

West Bengal

West Bengal-a Lok Sabha bial pariat-a inthlan neih turah hian vote nei mi 1,34,56,491 awmin candidate 68 an awm. Candidate zingah hian hmeichhia pakua an tel. Inthlanna tur bial pariat hi district pali huam chhunga awm niin, Trinamool Congress, BJP, Congress leh Left Front te an inbei dawn a ni.