SC-in Congress petition thehluh ngaihtuah remti

Supreme Court chuan Congress party-in Election Commission of India laka petition a thehluh chu ngaihtuah a remti.

Congress party chuan EC chu Prime Mi­nister Narendra Mo­di leh BJP president Amit Shah-ten inhuatna chawk tho thei zawnga thu an sawi leh, politics khelhna atana Armed Force-te an hman chungchanga complaint an thehluh ngaihthahah an puh.

Chief Justice of India Ranjan Gogoi-a kaihhruai bench chuan vawiinah peti­tion ngaihtuah nghal hi an remti a ni.

ECI laka petition thehluh hi phek 146-a chhah niin, Congress lawmaker Sushmita Dev thehluh a ni a, Modi leh Shah bakah BJP can­di­date dangte chungchang pawh tarlan a ni.

Congress party chuan EC-ah hian Model Code of Conduct (MCC) palzut chung chang hi 40 zet an thehlut tawh a, mahse poll body lam hian eng action mah a la lo tih a sawi.

March 10-a inthlanpui neih hun tur puan a nih aṭang khan Modi leh Shah hian kawng hrang hrangin Representation of the People Act leh Election Rules-te an bawhchhe fo tih an sawi. Inhuatna chawk tho zawnga thu an sawi bakah, ECI in a khap chungin armed force-te chu politics khelh nan an hmang a ni, an ti. PM Modi chuan MCC palzutin April 23 khan Gujarat-ah inthlan ni takin rally a huaihawt tih pawh an sawilang bawk.

Congress hruaitu hlun leh union minister hlui, P Chi­dambaram chuan Election Co­mmission chuan rorellai BJP leh PM Modi-a ten election rules palzuta thil tam tak an tih chu ngawi rengin a lo thlir niin a sawi a, EC chuan ram mipuite a tibeidawng a ni, a ti. Chidambaram chuan BJP in nationalism an kalpui dan chu NDA sorkar hlawhchhamna thupbona tura an ruahmanna siam a ni tih a sawi bawk. India mi tu pawh chu ram hmangaihtu tak vek an ni tih sawiin, BJP-in nationalism a kalpui dan chu awmze nei lo a ni, a ti.