PM rally-a sum sen zat kan zawtchhuak dawn : Mamata Banerjee

West Bengal Chief Minister leh Trinamool Congress hotu Mamata Banerjee-i chuan inthlanpui neih mekah BJP chu vote leina atana sum hmang nasaah a puh a, an party chuan Prime Minister Narendra Modi-an rally a neiha sum an sen zat chu poll panel-ah an zawtchhuak dawn tih a sawi.

East Midnapore-a rally a neihnaa thu a sawiah, "Election Commission hnenah prime minister public meeting neihna atana sum hman zat hi kan zawt dawn a ni. EC hian midangte sum hman ral zat kimchang a zawt thei a nih chuan, eng vangin nge PM pawh hi a zawh theih loh ang?" tiin Banerjee-i chuan a sawi a ni.

CM chuan BJP chu an rally-a tel tura mipuite sawmna atan sum tam tak sem chhuakah a puh a, sum hmanga vote lei ṭhinah a puh bawk.

PM Modi-a chu a nupui leh a nu zah tawk lohah a puh bawk a, a nupui hnenah zahna a lantir theih loh chuan mipuite hnenah pawh zahna a pe thei lo ang, a ti. PM nomination paper pawh a hmu tih sawiin, PM hian a nupui thil neihte chu a hriat loh thu a ziak a ni, a ti. Hetiang zawnga ṭawngchhuah hi duh lo hle mah se, PM thiltih dan chuan ṭawngchhuak turin a nawr niin a sawi.

Modi chu kum zabi 14 hunlaia Delhi lal sual tak, Muhammed bin Tughlaq ai pawha ṭha lo zawkah Banerjee-i chuan a puh. Kum 2016 November thlaa pawisa note lian pahnih tih thih chuan mipuite tan harsatna namen lo a thlen tih sawiin, tun thlengin nghawng a la nei reng a ni, a ti.