Delhi HC-in media khuahkhirh tura ngenna hnawl
Delhi High Court chuan mipat hmeichhiat lam hawia mawi lo taka chea Chief Justice of India Ranjan Gogoi-a puhna report chungchanga media khuahkhirh tura ngenna chu nimin khan a hnawlsak.
Petition thehluttu NGO, Anti-Corruption Council of India hnenah Chief Justice Rajendra Menon leh Justice Anup J Bhambani chuan hemi chungchangah hian inrawlh an tum lo tih sawiin, Supreme Court lama thlen zawk turin a ti a ni.
NGO hian CJI puhna chungchang hi newspaper, TV channel leh social media platform lama tichhuak lo tura media mite khuahkhirh turin an phut a ni. Hemi chungchang ngaihtuahtu, judge pathum awmna inquiry panel ten report an tihchhuah hma chuan media lama lo report ṭhin chu a ṭha lo niin an sawi a, hei vang hian mipuiten Indian judicial system an rinna pawh a bo phah thei niin an sawi.
Supreme Court-a hnathawk ṭhin, hmeichhe pakhat chuan CJI Ranjan Gogoi hi mipat hmeichhiat lam hawia a laka mawi lo taka cheah a puh a ni. CJI puhna chungchang hi Chief Justice Rajendra Menon kaihhruai judge pathum awmna bench chuan a ngaihtuah mek a ni.