India-ah hri kai tam ber ni thleng leh
India ramah Covid-19 hripui leng thawh hnihna a thleng mek a, Nilaini khan hri kai thar mi 1,26,789 awm belh lehin, hri len hnua ni khatah hri kai thar tam ber ni a ni leh.
Nilaini vek khan Covid-19 vangin mi 685 an thih belh leh a, thla nga chhunga ni khatah hripui vanga thi an tam ber ni a ni bawk.
Hri kai mek, active case pawh an pun belh chak hle a, kar liam tak chhung khan active case hi nuai thum dawnin an pung hman a, Nilaini thlenga hri kai mek awm zat hi nuai kua an chuang tawh a ni.
Maharashtra, Chhattisgarh, Madhya Pradesh leh Gujarat-ah chuan Nilaini khan ni khatah state chhunga hri kai tam ber ni a ni bawk. Maharashtra-ah hian hri kai thar 59,907 awmin, ram puma hri kai hmuh thar zinga 47% an tling pha a ni. Chhatisgarh-ah hri kai thar 10,310 awmin, Madhya Pradesh-ah 4,043 leh Gujarat-ah 3,575 an awm bawk.
Maha-in vaccine centre 26 khar
Hri kai pun chakna ber, Maharashtra-ah chuan Covid-19 vaccine indaih loh avangin vaccine centre 26 khar a ni. Hengte hi Mumbai khawpui chhunga mi an ni.
State health minister Rajesh Tipe chuan vaccine an indaih loh thu hi sorkar laipui leh union health ministry pawh hriattir a ni tawh tih sawiin, sorkar laipuiin vaccine pek chhuah kawngah a enhranna chhan a zawt bawk. Tope chuan an state chuan kar khatah vaccine dose nuai 40 vel mamawhin, thla khatah dose vaibelchhe 1.6 an an mamawh tih a sawi a, mahse an dose mamawh chanve vel chauh a ngai, Gujarat te nen dose in zat rengin sorkar laipui chuan a pe tih a sawi.
National Congress party MP Supriya Sule pawhin vaccine indaih lohna vangin Pune-ah pawh vaccine centre 100 chuang khar a ni tawh tih a sawi bawk.
New Zealand-in India aṭanga luh khap
India rama hri leng a hluar chhoh leh tak avangin New Zealand chuan nimin aṭang khan India ram aṭanga an ram luh a khap. An ram mi leh sa ngei pawh India ram aṭanga kalte an luh a remti lo a, he khapna hi kar hnih chhung hman phawt a ni ang.
Nilaini khan New Zealand-a hian hri kai thar 23 an awm a, heng zinga 17 chu India ram aṭanga lut an ni. Ni 40 chhung tualchhung aṭanga hri kai thar an awm loh hnuah border-ah hri kai hi an hmu thar leh a ni.
Prime minister Jacinda Arden chuan nimina Auckland-a news conference a neihah, India ram aṭanga khualzin luh khap a nih thu a puang a, April 28 thleng a huam ang. Hemi chhung hian sorkar chuan hma lak dan tur hrang hrangte a ngaihtuah dawn a ni, a ti.