ECI-in Mamata hnenah hriattirna pe

Election Commission of India (ECI) chuan West Bengal chief minister Mamata Banerjee chu model code of conduct (MCC) palzuta puh a nih chungchangah insawifiah tura hriattirna a pe.

Trinamool Congress hotu, Mamata Banerjee hian kar liam ta khan a campaign-naah minority voter-te political party hrang hrangah an vote tidarh lo turin a ngen. Hindu-te pawh BJP thusawi an ngaihthlak avanga Hindu leh Muslim ti zawnga inthliar lo turin a ti bawk.

ECI chuan Mamata hian sakhaw behchhana vote zawn khapna, Representation of the People Act 1951 leh MCC a bawhchhia nia sawiin, Nilaini khan darkar 48 chhunga insawifiah turin a hriattir a ni.

Trinamool Congress chuan ECI hriattirna pek chungchang hi chhangin, Commission chu party ṭan bik nei lo a ni zel em tih zawhna lian tak a awm tawh tih an sawi. "ECI hian BJP complaint avangin Mamata hnenah insawifiah tura hriattirna hi a pe a ni. TMC-in BJP candidate-in BJP meeting-a telte pawisa fai leh, cash coupon a sem lai ngei video a thehluh chungchangah khan eng angin hma a lak ve? Party hleih bik nei lo a nihna hi vawng nung zel teh u," tiin TMC MP Mahua Moitra chuan a twitter-ah a chhang let.