Vawiinah Pakistan-in IAF pilot a chhuah dawn Joint military press meet nei

Pakistan Prime Minister Imran Khan chuan Nilaini-a Pakistan sipaiten an ram china tla, Indian Air Force (IAF) wing commander Abhinandan Varthaman an man chu vawiin hian an chhuah dawn tih a sawi.

Imran Khan chuan nimina Parliament joint session an neihah IAF pilot hi chhuah a nih tur thu sawiin, hei hi Pakistan-in muanna a duhzia a lantirna a ni, a ti. Hemi rual hian boruak ṭha lo a awm leh a nih chuan Pakistan chuan a chhang let ngei dawn tih a sawi bawk. Khan-a chuan Kashmir chungchangah ram pahnihten inbiakna an neih chu thil ṭul leh pawimawh tak a ni, a ti.

Pakistan PM chuan Nilaini khan PM Narendra Modi chu biak a, ram pahnih inkara buaina awm a duh loh thu hrilh a tum niin a sawi. Buaina bengdaih tuma an nawrna chu an hlauh vang a ni lo tih a sawi nghal bawk.

"India pilot kan kawl mek a, mahse muanna kan duhzia lantirna turin naktukah kan chhuah zalen dawn a ni" tiin Imran Khan chuan National Assembly-ah a sawi. PM thusawi lawmna lantirin Parliament member-te chuan dawhkan an lo beng a ni.

Joint Military Press meet :
Pakistan PM-in IAF pilot Varthaman Abhunandanan chhuah tur thu a puan hnuah, nizan dar 7 khan South Block-ah Joint Army, Air Force, Navy press meet neih zui a ni. Press meet hi Ministry of External Affairs aiawh pawhin a telpui a ni.

Military press meet-ah hian Assistant Chief of Air Staff - Space Operations Air Vice Marshal Ravi Kapoor, Additional Director General Military Operations Major General Surendra Singh Behal leh Director General Naval Operations Rear Admiral DS Gujral-te an inlan.

Air Vice Marshal RGK Kapoor chuan February 27 khan IAF chuan Pakistan aircraft-te India ram an rawn pan tih radar aṭanga hriat a ni a, IAF fighter-te chu Pakistan aircraft lo dang turin hrilh an ni, a ti. IAF aircraft-te chuan Pakistan aircraft hi lo dangin, kan sipai hmunte pawh an rawn kap chhe thei ta lo, a ti. Pakistan nena inbeihnaah hian IAF chuan MiG-21 pakhat chanin, a pilot chu parachute-a a zuanthlaknaah Pakistan ram chhungah a tlak luh avangin Pakistan chuan an lo man a ni, a ti. Pakistan chuan he inbeihna thleng chungchangah hian thu dik lo tam tak sawiin, pilot dang pawh an man tel ni tein an sawi a, mahse an thusawi hi sut lehin pilot pakhat chauh an man tih an sawichiang ta a ni, a ti.

IAF chuan India ram chinah air-to-air missile themte an hmu tih sawiin, IAF hian Paksitan F-16 fighter jet chu a kahthlak sak ngei a ni, tiin Kapoor chuan a sawi. Pakistan-in IAF Wing Commander Abhinandan chhuah a tum thu a sawi chu lawmawm an ti takzet tih a sawi bawk.

IAF-ten Thawhlehni zinga Pakistan rama Balakot-a beihpui an thlaknaah khan beih an tum tak an fuh tih sawiin, mahse JeM camp an beihnaa thi zat tak chu an la sawichian theih loh thu a sawi.

Major General Surendra Singh Behal chuan Army thuchhuah a chhiarchhuak bawk. "Pakistan chuan India sipaite hmun chu beih a rawn tum ngei a, mahse LoC lama kan lo inbuatsaih lawkna leh kan siaiten rang taka an chhanlet nghal avanign an thil tumte kan tihthlawntir thei a ni", a ti. Hetiang thil hi thleng mah se Indian Army chuan boruak muanawm leh ngelnghet siam chu a tum ber a ni reng a ni, tiin a sawi. Sipaite chuan eng pawh hmachhawn turin an inpeih reng tih India ram mipuite an hriattir duh thu a sawi. Pakistan chu an phu ang chhanna an pe a, an la pe chhunzawm zel dawn tih a sawi.

Assistant Chief of the Naval Staff Rear Admiral DS Gujral pawhin Navy te chu Pakistan thiltih dik lo dang tur leh hneh turin a inpeih reng tih a sawi a, a ṭul hun apiangah rang takin an che chhuak dawn tih a sawi. Army leh IAF nen chuan India leh a ram mipuite himna turin an ding tlang zel dawn tih a sawi a ni.

Hetihlai hian Prime Minister Narendra hoin a chenna inah high-level security meeting neih a ni bawk.