Eptuten PM Modi an dem

Pakistan-in IAF pilot an man hnuah Prime Minister Narendra Modi leh BJP hruaitute Lok Sabha inthlanpui neih tur kaihhnawihah an programme neihte an ṭhulh duh loh avangin eptu party hrang hrangte chuan na takin an sawisel.

Eptu party-te chuan Pakistan nena an inbeih mek avangin inthlan kaihhnawiha an programme neih hrang hrangte chu an ṭhulh hlawm tih an sawi a, hetihlai hian central-a rorellai BJP chu sipaite thihna chu politics lama hlawkpui tumah an puh.

PM Modi hian nimin khan party worker-te chu video conference a neihpui a ni. Nilainia Pakistan-in IAF pilot an man hnu lawkah BJP hian vawiin PM programme neih tur hi twitter-ah an puang a, hei hian sawisel a hlawh hle.

Congress chuan nimina party working committee a neih tur chu an ṭhulh thung. Pakistan kuta tang mek, IAF pilot dinhmun ngaihtuaha ram mipuite rilru nuam lo taka an awm laia meeting lo neih chu a hun lo nia an ngaih thu a sawi. Hemi rual hian BJP chuan party worker meet neiin, ram dinhmun aiin inthlana seat neih zat tur tih vel an ngai pawimawh zawk niin an sawi.

Delhi state puitlinga hlankai phuta nawrh huaihawt, Delhi Chief Minister Arvind Kejriwal-a pawhin a nawrh huaihawt hi a titawp lailawk a, PM pawh a programme neihte sawn hla mai tura ngenin, tun hunah chuan India ram chuan ngaihtuahna hmun khatin, IAF pilot him taka hruai haw a nih theih dan tur a ngaihtuah a ngai a ni, a ti.

BSP hotu Mayawati pawhin India-in indo hmachhawn maithei dinhmun a tawh mek lai leh ramin hruaitu a mamawh lai takin, PM Modi chuan ram himna lam ngaihtuah aiin BJP worker-te hmaa thu sawi a, politics lama hlawkna hmuh theih dan a ngaihtuah zawk a ni, tiin a sawi.

SP hotu Akhilesh Yadav chuan IAF pilot man niin IAF sipai parukten thlawhtheihna tlaah nunna an chan bawk a, mipuite chu ram himna turin an ṭawngṭai a, hetihlai hian hruaitute aṭangin eng thu mah hriat tur a awm lo a ni, a ti.