Pakistan jet-te India ram boruakah rawn luh tum leh

Pakistan fighter jet pahnihte chuan nimin khan Jammu and Kashmir-a Krishna Ghati sector-ah Line of Control (LoC) kaltlangin India ram boruak chinah rawn thlawh luh leh an tum a, mahse India Air Force (IAF) aircraft-ten an lo um let thei a ni.

Thawhlehni zinga IAF-ten LoC kaltlanga Pakistan ram chhunga Jaish-e-Mohammed (JeM) camp an beih hnuah Pakistan chuan rawn beih let ve a tum nghal a, Nilaini khan ram pahnihte hian ramri pela indo thlawhtheihna thlawk lutte chu an inkahthlak sak ve ve a, hei hi 1971 hnua a thlen ṭum khatna a ni.

IAF-ten Pakistan F-16 fighter jet an kah chu Pakistan-occupied-Kashmir (PoK)-ah tlain, he thlawhtheihna tla thlalak hi news agency ANI chuan a tilang. Thlawhtheihna tla bulah hian Pakistan sipaite pawh hmuh an ni a, an zingah hian Pakistan Army 7 Northern Light Infantry-a Commanding Offier pawh a tel.

Nilaini zing khan Pakistan Air Force fighter jet pathum leh F-16 pakhat te chuan India sipai hmun rawn kah tumin J&K-a Naushera sector-ah LoC an rawn kaltlang a, mahse heng hi IAF Mi-G-21-te chuan lo dangin, PAF jet hi an umkir a, pakhat chu kap fuhin PoK-ah hian a tla ta a ni.

Pakistan pawhin IAF MiG-21 pakhat chu a kahthlak sak bawk a, thlawhtheihna hi Pakistan ram chinah tlain a pilot Wing Commander Abhinandan Varthaman chu an man a ni. Pilot an man hnuah Pakistan lam hian Geneva Convention resolution palzutin, pilot an man video hi an tichhuak a, hetah hian pilot-in a hming, rank, service number leh a sakhua a sawite tihlan a ni.

Pakistan sipaiten IAF pilot hliam tuar thlalak an tihdarh hi India chuan nasa takin a sawisel a, pilot chu him taka India kuta hlan turin a phut. Pakistan sipaiten IAF pilot hliam tuar thlalak an tidarh chu dan kalh a ni tiin, Pakistan sorkar chuan an kuta tang mek Indian defence mi leh sa hi kut a tuar tir tur a ni lo, a ti.