India kutah IAF pilot Varthaman hlan

2nd March, 2019

Pakistan chuan Punjab-a Wagah-Attari border-ah Nilaini-a Indian Air Force (IAF) pilot a man, Wing Commander Abhinandan Varthaman chu chhuahin, nimin tlai dar 5:22 khan India kutah a hlan.

Wing Commander Varthaman hi Nilaini khan a thlawhtheihna khalh, MiG21 Bison chu Pakistan ram china a tlak hnuah Pakistan sipaiten an man zui a ni. Mahse Pakistan Prime Minister Imran Khan chuan Ningani khan India nena an inkar boruak ṭha siam an duhzia lantirna turin Indian pilot hi chhuah a nih tur thu a puang ta a ni.

Nimin tlaia India kuta hlan a nih hmain Wagah-ah hian Varthaman hi medical check-up neihpui leh phawt a ni a, hemi hnu hian IAF kutah hlan a ni ta a ni. Varthaman hi IAF Air Vice Marshal pahnih, RGK Kapoor leh Sreekumar Prabhakaran ten Wagah border-ah hian an lo hmuak a ni.Wing Commander Varthaman hi Lohare aṭangin Indian high commission official ten an rawn zui bawk.

Varthaman hi Amritsar-ah hruaiin hruai nghal a ni a, a fitness level endikin medical test hrang hrang neihpui nghal a ni. Pyschological test-te pawh a neihpui a la ngai dawn nia sawi a ni bawk. Amritsar aṭang hian special plane hmangin Delhi panpui a ni ang.

India ngenna Pakistan-in hnawl
Pakistan-in IAF pilot Abhinandan Varthaman a chhuah tur thu a puan hnuah India chuan thlawhtheihna hmanga thawn haw turin a ngen nghal a, mahse Ningani zan khan Pakistan chuan thlawhtheihna hmang loin, Punjab-a Attari-Wagah border kaltlanga haw tir a nih tur thu a sawi.

Defence Ministry chuan Nilaini-a Pakistan sipaiten an man, Wing Commander Varthaman hruai haw tur hian Pakistan rama special aircraft tirh pawh a inhuam thu a sawi a ni. Mahse Pakistan lamin rem an tih tak loh avangin Wagah border-ah India kutah hlan a ni ta zawk a ni. Wagah border hi Lahore, Pakistan aṭanga km 25 vela hla a ni.

Pakistan-a Islamabad High Court chuan nimin khan Pakistan mi pakhatin IAF pilot chhuah tumna dang rih tura a ngenna chu a hnawlsak. Petition thehluhtu hian Indian pilot hian Pakistan lakah pawi a khawih nia sawiin, thubuai siamsak zawk turin a ngen a ni.