PM Modi-a'n complete lockdown puan tum lo 'Night curfew' tih aiah 'corona curfew' ti turin hriattir

Ram chhungah hri leng hluar thar lehin, Covid-19 hri kai pun belh zel mah se complete/total lockdown puan a ni dawn lo tih prime minister Narendra Modi chuan a sawi.

Nimina state leh union territory ṭhenkhat chief minister-te nena virtual meeting an neihah, Prime chuan hripui leng vangin lockdown khauh tak puan ni tawh dawn lo mah se, mitinte hri leng mek dona kawngah theihtawp an chhuah a ṭul thu a sawi. "Chona hautak tak kan hmachhawn leh mek, mitinte chu Covid-19 hri leng mek dona kawnga rawtna in neite sawi turin ka ngen a ni," a ti.

Hri leng hluar thar leh avanga state/UT ṭhenkhatten night curfew an puan mekah, PM chuan hri leng mek chungchanga mipuite inzirtirna a nih nghal theihna turin 'night curfew' tih aiah 'corona curfew' tia sawi turin a ti bawk.

State ṭhenkhatin kum 18 chunglam chin tawh phawt hnenah Covid-19 vaccine pek an rawtna chu PM chuan a hnawl. Tuna vaccine pek chhuah kalpui mekah kum 45 chinte pek an ni chu a ṭha tih sawiin, hei hi ram tam zawk kalphung pawh a nih thu a sawi a ni.

Hri kai thar tam ber ni thleng leh
Nitin hri kai an pung zel a, India rama hri kai tam ber ni pawh a thleng leh fo tawh.

Ningani khan ram pumah Covid-19 hri kai 1,31,968 awm lehin, hripui a len hnua ni khata hri kai thar an tam ber ni a ni leh. A zawnin ni li chhung chu hri kai thar hi nuai chuang zel an awm tawh a ni. Union health ministry tarlan danin, Ningani khan hripui vanga thi mi 780 an awm leh bawk. Hripui vanga thi hi 1,67,642 an tling tawh.