India-in Bangladesh sipaite tan Covid vaccine nuai khat a pe

Indian Army chief General MM Naravane chuan Ningani khan Bangladesh sipai hotu General Aziz Ahmed hnenah Covid-19 vaccine nuai khat a pe.

Bangladesh-a cham mek India sipai hotu General MM Naravane leh General Aziz Ahmed-te hian Ningani khan meeting an nei a, hetah hian ram pahnihin sipai lama thawhdunna an neih tur chungchangte leh hun lo la awm tura an thawhdun lehzelna tur chungchangte pawh an sawi a ni.

Border Road Orga­nisation, Army pilot training, defence expert leh trainer inthlak thleng leh defence lama thawhdunna turte chu an thusawi dun pawimawh zingah a tel. General Aziz chuan Rohingya chungchangah India chuan Bangladesh chu a thlawp chhunzawm a beisei thu a sawi bawk.

Kar hnih pawh la liam loah khan prime minister Narendra Modi chuan Bangladesh hi a lo tlawh tawh a ni. General MM Naravane hi ni nga chhung Bangladesh-ah hian a cham ang.