Vaccine thawn chhuah titawp turin Rahul-a'n ngen

Congress party hru­ai­tu Rahul Gandhi chuan prime minister Narendra Modi hnenah lehkha thawnin, Covid-19 vaccine chu ram chhunga a mamawh apiangte hnenah pek a nih theihna atan ram danga thawn chhuah chu titawp rih turin a ngen.

Rahul Gandhi chuan vaccine pek kalpui dan ang chuan nghawng ṭha lo tak a awm a hlauthawn thu a sawi. Tuna vaccine pek dang chuan ram mipui 75% vaccine pe tur pawhin kum eng emaw chen hun a duh dawn a ni, a ti. Hei bakah hian sorkar chu tuna hman mek ni lo, vaccine dang pawh siam chhuah a nih thuai theihna atana hma la chak turin a ngen bawk.

Gandhi chuan, "Vacci­nation programme kan kalpui mek hi vaccine certificate-a mi pakhat thlalak chuantir tur ringawt kan buaipui piah lamah kalpui a ngai a, a tam thei ang ber pek an ngai a ni," tiin a hminghmerha sawi lang loin, vaccine la tawhte hnena certifi­cate pekchhuahah PM Modi-a thlalak dah lan a ni chungchang chu a sawichhuak.

Covid vaccine indaih lohna avangin Mumbai khawpuia vaccination centre 71 chu khar a ni tawh. Mumbai-ah hian centre 120 a awm a, mahse centre 71-ah vaccine pek chhuah tur hi an nei tawh lo a ni.