Kum 18 chinten an sakhaw vawn thlang turin zalenna nei: SC

Supreme Court chuan nimin khan sakhaw inleh leh black magic khapna tura ngenna petition thehluh chu ngaihtuahin, kum 18 tling chin chu an sakhaw vawn tur thlang turin zalenna an nei a ni, a ti.

Justice RF Nariman, BR Gavai leh Hrishikesh Roy awmna bench chuan petition thehluttu aiawha inlan, advocate Gopal Sankaranarayana hnenah kum 18 tling chin tawhte chu an sakhaw vawn duh dansak an nihna chhan tur a awm lo tih an hrilh.

Bench chuan petition thehluttu advocate Ashwini Kumar Upadhyay lakah a lungawi lo hle tih sawiin, petition a thehluh chhan pawh inthehlar tumna mai niin a puh hial a ni. Bench in a ngaihdan a sawi hnu hian advocate Sankaranarayana chuan petition thehluh hi sut leh a dil nghal a ni.

Upadhyay hian a petition thehluhah India ramah kum za tam tak sakhaw inleh luihtirna a thlen fo thu sawiin, hetiang thil tihtawp a nih theihna atan state tinin hma an lak a ṭul thu a sawi. A bikin SC-ST hnam zingah sakhaw inlehtirna hi a thleng nasa niin a sawi. Inthlemna leh invauna hmangte an sakhua lehtir an ni fo chungin, sorkar laipui chuan awmze neiin hma a la lo a ni, a ti. Hei vang hian ram puma hman turin sakhaw inleh khapna, Anti Conversion Law chu siam turin sorkar laipui a phut a ni.