Pakistan-a IAF airstrike-ah thi an awm lo : BJP MP

Bharatiya Janata Party (BJP) lawmaker SS Ahluwalia chuan Indian Air Force (IAF) ten Pakistan-a Jaish-e-Mohammad (JeM) camp an beihnah khan thi an awm lo tih sawiin, an tum chu mihring va thah ni loin Pakistan zirtirna pek a ni, a ti.

Darjeeling constituency BJP MP, Ahluwalia hian kar kalta Zirtawpnia Siliguri khua-a West Bengal state-a digital village hmasa ber tur a hawnnaah he thu hi a sawi a, IAF-ten airstrike an neihah hian mi 300 vel an thi tih chu Prime Minsiter Narendra Modi emaw, an party thupuangtu tumahin an sawi lang lo tih a sawi.

"Airstrike neih a nihna chhan ber chu Pakistan hnenah inbul hnai takah rawn kalin kan duh chuan kan tichhe vek thei cheu tih hriattirna a ni. Venhimna lamah theihtawp chhuah mah ula, kan tichhe thei reng che u. Mihring inthahsak erawh kan duh lo a ni" tiin a sawi.

National leh international media hrang hrangah IAF airstrike chungchang hi a chhiar a, airstrike neih zawh hnu lawkah Churu-a PM Modi-a thusawi pawh a ngaihthla a, firfiak 300 thah a nih tih a sawilang lo a ni, tih a sawi. BJP thupuangtu emaw, party president Amit Shah emaw pawhin thi zat hi an sawi lo, a tibawk.

Hetihlai hian Trinamool Congress chuan Pakistan-a airstrike neiha firfiak thi zat chungchang sawi uarah BJP minister-te an puh. Mamata Banerjee-i kaihhruai TMC chuan he thil thleng chungchanga sorkar laipui thusawi chu thutaka lak a harsa tawh niin a sawi.

Trinamool Congress thupuangtu Derek O'Brien chuan a security force lam chuan airstrike neiha thi zat hi engmah an sawilang lo a, mahse BJP minister lam zawkin a zat hi an sawichhuak a ni tiin, hei hi media te awihin firfiak 200-300 vel an thi niin nasa takin an puangzar zui a ni, a ti. O'Brien chuan BJP president Amit Shah leh PM Modi-te chu he thil thleng chungchang politics khelhna hmanruaa hmangah a puh bawk.

Hemi hma hian West Bengal Chief Minister leh TMC hotu Mamata Banerjee-i chuan sorkar laipui hnenah JeM camp beihnaa thil thleng dik tak finfiahna pe turin a lo phut tawh bawk.

Congress hruaitu Digvijaya Singh pawhin Inrinni khan sorkar laipui hnenah JeM camp beih a ni tih finfiahna hi pe turin sorkar laipui a phut. Singh chuan, "IAF ten Pakistan firfiak camp an bei tih hi a rinhlelh vang a ni lo tih sawiin, mahse tunlai hunah chuan an thiltih finfiahna tur hi satellite technology kaltlangin thlalak hmuh tur a awm vek a, hei vang hian finfiahna hi kan pek ngei a ngai a ni. US sorkar pawhin Osama bin Laden an that tih finfiahna khawvel hmuh turah an pholang a ni", tiin a sawi.

Digvijaya Singh chuan IAF pilto Abhinandan Varthaman an chhuah avangin Pakistan Prime Minister Imran Khan chu a fak a, hemi rual hian India rama pawikhawihna thlentu Lashkar-e-Taiba dintu Hafiz Saeed leh JeM hotu Masood Azhar te pawh India kuta hlan leh turin a ngen nghal bawk.