IAF air strike-ah mi 250 chuang an thi : BJP president

Bharatiya Janata Party (BJP) hruaitu pakhatin Indian Air Force (IAF) ten Pakistan-a Balakot-a Jaish-e-Mohammed (JeM) firfiak camp an beihnaah thi an awm lo nia a sawi hnuah, Pathianni-a Gujarat-a rally a neihnaah BJP president Amit Shah chuan IAF air strike-ah khan firfiak 250 chuang an thi niin a sawi ve leh thung.

Ahmedabad-a public meeting a neihnaah Amit Shah chuan, "Uri-a pawikhawihna thlen hnuah kan sipaite chu Pakistan-ah kalin surgical strike an nei a, kan sipai thite phuba an va la a ni. Pulwama-ah pawikahwihna a thlen hnuah mi tam takin surgical strike neih an rin tawh lo hnuah, Prime Minsiter Narendra Modi-a rorelna hnuaiah kan sorkar chuan airstrike nei lehin firfiak 250 chuang thah an ni leh a ni", a ti.

Eptu party hrang hrangten IAF air strike neih chu politics khelhna hmanrua-a hmangah BJP an puhna chu phain, BJP presidnet chuan India chu khawvel ram zingah US leh Israel tih lohah a sipai thite phuba lak saktu ram pathumna a ni, tiin a sawi.

Amit Shah hian Surat-a thu a sawinaah, "A hma chuan kan sipaite chu an lu te tansakin na taka beih an ni ṭhin, Mahse tunah chuan kan sipai pawh Pakistan ram chhungah ngei tlain, an indo thlawhtheihna F-16 a kahthlak sak hnuah pawh darkar 24 chhungin a rawn kir leh a ni. Hetianga danglamna nasa tak a thlen chhan chu Narendra Modi-a thiltih theihna vang a ni", tiin a sawi bawk.

Hemi hma lawk hian BJP hruaitu leh Union Minister SS Ahluwalia chuan IAF air strike neihnaah thi an awm lo a, an tum ber chu mi va thah ni loin Pakistan zirtirna pek a ni tih a sawi. Mi 200-300 thi nia sawi chungchang chu PM Modi, sorkar thupuangtu leh BJP hruaitu lamin engmah an sawilang lo niin a lo sawi tawh a, mahse he thu a sawi hnu lawkah Amit Shah chuan mi 250 chuang an thih thu hi a sawichhuak ve leh ta a ni.