JeM camp beih chungchangah sawizui a tam

IAF-ten JeM camp an beih chungchangah hian sawizui a tam hle a, sorkar lamin an target hi fuhin firfiak pawh eng emaw zat an thi nia a sawi laiin, Pakistan lam chuan JeM camp hi an bomb fuh lo a, thi pawh an awm lo niin a sawi thung.

Sorkar lamin satellite image a la tihchhuah loh avangin thil awmdan dik tak sawichian theih a la ni lo. NDTV chuan sorkarin hmun pahnih aṭanga image a lak aṭangin IAF bomb thlak hian Balakot-a JeM ho hmun panga chu a fuh ngei nia a lan thu a tarlang. Zee News pawhin satellige image an hmuh aṭangin JeM camp hi nasa taka bomb chhiat ngei a ni tih a sawi ve bawk a, mitthi an awm leh awm loh erawh an sawichiang thei lo tih an tarlang.

Hetihlai hian Inter-national Cyber Policy Centre, Australia chuan IAF ten beihpui an thlak tuk, February 27 zinga Planet Labs Inc. in satellite image a lakleh ASPI in a he thlalak a zirchian aṭangin, India-in Balakot a beihna a hlawhtling tia a sawi chu zawhna a awm thei dawn niin a sawi. Report siamtu, Nathan Ruser chuan, "Heng image kan hmuh aṭang hian Balakot camp-a faciliy leh a bul vela thil tihchhiat lanna kan hmu lo a, local media-te pawhin ram ruakah bomb tlakna hnuhma hmu angin an tarlang bawk a, hei vang hian IAF hian a target hi a ṭhelh a ni thei a ni", a ti.

Foreign media ṭhenkhat pawhin IAF airstrike chungchangah hian zawhna siamin, air strike hian JeM hmun engmah a tichhe lo nia sawiin, India-in firfiak camp a bomb chhe vek nia a insawi chungchang hi an zawt let hlawm a, firfiakte pawh an thi tel nia a sawi chu finfiahna a awm lo niin a sawi ve bawk.