JeM camp kan bomb fuh ngei a ni : Air chief

Air Chief Marshal BS Dhanoa chuan nimina Coimbatore-a press conference a neihah, February 26 zinga IAF-ten Pakistan ram chhunga air strike an neih khan an target, JeM camp chu an fuh ngei tih a sawi. Hemi rual hian camp an beihnaa firfiak thi zat erawh chu an sawi tur a ni lo tih a sawi.

Air chief chuan, "IAF hi mitthi zat sawitu tur a ni lo a, sorkarin a rawn sawichiang mai dawn a ni. Mitthi zat hi kan chhiar lo a, kan target kan fuh nge fuh lo tih chu keini buaipui zawk a ni", a ti.

Pakistan indo thlawhtheihna ṭha, F-16 beih letna atana MiG 21 Bison hman a nih chungchanga sawiselna awm pawh chhangin, Air chief chuan hmelmate beih letna atan chuan aircraft remchang a piang hman a nih thu a sawi. "Operation plan lawkah chuan aircraft hman tur te pawh duan lawk a ni a, mahse hmelmaten an rawn beih erawh chuan eng ang aircraft pawh a remchang apiang hman a ni. Kan aircraft te hi hmelmate beihna atana tlak vek an ni", a ti. Mig-21 Bison chu aircraft rintlak a ni tih sawiin, upgrade a ni tawh a, radar, air-to-air missile leh weapon system ṭha zawka thuam a ni, tiin a sawi.