Ni khatah hri kai thar nuai 1.5 chuang awm leh

India ramah Inrinni liam ta khan Covid-19 hri kai thar mi 1,52,879 an awm a, ni khata hri kai tam ber ni a thleng leh. Hemi ni vek hian hripui vanga thi mi 839 an awm bawk a, ram puma hri vanga thi hi nuai 1.69 an tling tawh a ni.

Ni nga chhung chu a zawnin hri kai thar hi nuai khat chuang an awm ziah tawh a, Inrinnia hri kai thar hi a hma ni, Zirtawpnia hmuh thar aiin 5% in an tam zawk. Hri kai enkawl mek, active case pawh ni 32 chhung a zawnin an pung tawh bawk. Hri kai hmuh chhuah tawh aṭangin hri kai enkawl mek hi 8.29% an tling a, hri kai enkawl dam, recovery rate pawh a tlahniam chak hle a, 90.44% a ni tih union health ministry chuan a tarlang.

Hri leng thawh hnihna thleng mek avangin state tam takin khuahkhirhna tikhauh lehin, zan lam curfew-te an puang tawh. Ram chhunga hri kai leh thihpui tamna ber state, Maharashtra chief minister Uddhav Thackeray chuan an state dinhmunin ziaawm lam a pan thuai loh chuan lockdown puan a ngaih tawh mai theih thu a sawi. Inrinni khan CM kaihhruai all-party meeting-ah state puma ni 15 chhung total lockdown puan rawtna chungchang pawh an ngaihtuah a, mahse thutlukna erawh an la siam lo. Kar hmasa khan Maharashtra sorkar hian hri darh tur venna kawng khat atan April thla chhung weekend lockdown, Zirtawpni zan dar 8 leh Thawhṭanni zing dar 7 inkarah a lo puang tawh a ni.

Delhi pawhin Inrinni khan khuahkhirhna thar siamin restaurant, theatre, public transport leh inneih leh mitthi vuinaa tel thei zat bithliah a siam thar. Delhi chief minister Arvind Kejriwal chuan hri leng thawh lina an tuar mek tih sawiin, hei hi a thawh thumna ai pawhin a nasa zawk a ni, a ti. Hemi rual hian lockdown puan chu hri leng dona ṭha ber a ni hran lo tih a sawi thung.

Uttar Pradesh pawhin sakhaw thilah pawh mi panga aia tam punkhawm khapna a siam thar bawk.