Ni 85 chhungin Covid vaccine dose mtd 100 pe

Ram pumah Covid-19 vaccine pek chhuah chhunzawm zel niin, kar liam ta Inrinni khan vaccine dose maktaduai 100 pek chhuah a ni tawh.

India chu vaccine dose mtd 100 pek chhuahna atan hun hmang rei lo ber niin ni 85 chhungin a pe hman a, US chuan ni 89 leh China-in ni 102-ah dose mtd 100 hi an pe hman a ni. April 1 aṭanga vaccine pek thawh thumna, kum 45 chin hnena pek a nih aṭang nitin vaccine hi dose nuai 30 vel zel pek chhuah a ni.

Prime minister Narendra Modi chuan nimin khan vaccine la thei tura bithliah chin a tam thei ang ber hnena vaccine pek kalpuina, ni li awh tur 'Tika Utsav' (vaccine festival) chu a hawng a, state leh union territory tinte hnenah vaccine hi a tam thei ang ber hnena pe chhunzawm zel turin a chah.

PM Modi chuan mipuite hnenah ngenna pali siamin, vaccine la thei chinten an lak theihna tura pui tur te, Covid hri kaite enkawlna kawnga an theih anga pui tur te, mask vuah ṭha tur leh midangte pawh vuah tura fuih tur te leh Covid-19 hri kai an lo awm chuan micro-containment zone siam turtein a ti a ni.