India leh China sipaite a vawi 11-na atan an inbia

India leh China sipaite chuan Zirtawpni khan a vawi 11-na atan inbiakna an nei a, hetah hian ramria intihbuai loh an remti ve ve a, Ladakh khawchhak lama buaina thar siam loh pawh an remti ve ve bawk.

Corps-Commander level-a inbiakna vawi 11-na hi Chushul-a ramriah neih niin India LAC lamah neih a ni a, chawhma dar 10:30 aṭanga zan dar 11:30 thleng inbiakna hi an nei a ni.

Indian Army chuan Inrinni khan thuchhuah siamin ram pahnih aiawhte chuan an buaina chu buaina chhuak lo zawnga chinfel an remti tih leh inremna leh kaldan phung awm sa zawm chunga chinfel an tum tih an tarlang.

Ram pahnih sipai aiawha inbiakna neite chuan an hruaitute thupek zawm chu pawimawh an tih thu sawiin, buaina chinfelna tur resolution siam vat a nih theihna atan a rang thei ang bera inbiakna neih leh an remti bawk.