J&K-ah firfiak panga that

Security force-te chuan nimin khan thuchhuah siamin Jammu and Kashmir-ah firfiak panga thah an ni tih an tarlang a, security force pahnih an hliam tih an tarlang bawk.

Thuchhuah an siamah chuan hmun hnihah a hrangin beihpui an thlak tih tarlangin, firfiak an thah zingah chuan kum tling lo pawh an tel niin an sawi.

Hadipora village, Shopian district-a beihpui an thlaknaah firfiak pathum an that a, chung zingah chuan kar khat vel liam taa chin hriat loha bo, firfiak pawl zawm ngei nia an rin kum tling lo pawh a tel a ni. Police-te chuan beihpui an thlaknaah hian inpe mai turin an ti a, mahse a inpe duh lo niin an sawi bawk.

Vijay Kumar, Inspector General police chuan kum tling lo an thah nu leh pate ngei pawh an inkahna hmunah chuan hruaiin anni pawh chuan inpe mai turin an ti a, amah ngei pawhin inpek mai a tum laiin a thurualpuite chuan an lo dang a ni, a ti.

Police-te chuan beihpui an thlak hun chu Inrinni tlai lam kha a ni tih sawiin Army, police leh CRPF-te chuan ṭangrualin beihpui hi an thlak niin an sawi. An inkahna hmunah hian rifle pakhat leh pistol pakhat chhar a ni bawk. Police-te chuan Anantnag-ah Zirtawpni khan beihpui thlak a nih thu sawiin, hetah hian firfiak pahnih an that tih an sawi.

Ni thum liam ta chhung khan security force-te chuan Kashmir-ah firfiak 12 an that tawh a ni.