US-in sumdawnna lama India hamṭhatna pek tihtawp tum

Sumdawnna kawnga India leh Turkey-te duhsakna a pek chu US President Donald Trump chuan a titawp dawn niin US trade chief office chuan a tarlang.

Generalized System of Preferences (GSP) program hnuaiah US chuan developing country zingah India leh Turkey hi beneficiary status a pe a, mahse hei hi Trump chuan tihtawp a tum tawh niin a sawi.

US House of Representatives Speaker Nancy Pelosi hnena lehkha a thawnah, President Trump chuan GPS eligibility criteria-te chu India market chuan a zawm em tihte a zirchiang dawn tih a sawi a, hei bakah hian Turkey economy pawhin hma a sawn chhoh zel tawh avangin hamṭhatna an pek hi tihtawp a tum tih a hrilh a ni.

GSP hnuaiah US-in hamṭhatna a pek ramte hian Congress-in criteria a siamte an zawm chuan an bungraw thawnluh eng emaw zat chu US-ah chhiah pek ngai loin an thawn lut thei a ni. Hemi hmang hian India pawhin US-ah hian chhiah chawi loin bungrua dollar tluklehdingawn 5.6 hu a thawnlut a ni. US rama a thawnluh bungrua 1,937 chu GSP hnuaiah hian thawn an ni ṭhin. GSP hian a huamchin hi agricultural product lam an ni ber a, animal husbandry, meat, fisheries leh handicraft product-te an tel bawk.

US chuan GSP hi ram rethei zawkten sumdawnna hmanga an ram economy siamṭhatna leh an retheihna aṭanga inkhaihchhuah theihna tura a ruahman a ni. Developing country-ah preferential tariff system hi hmangin, heng ram aṭanga an bungraw lakluhte chu chhiah chawi tlemte emaw, chhiah chawi lo emawa an thawnluhte a phalsak a ni. US bakah UK leh European Union-te pawhin developing country aṭanga bungrua an lak luhnaah GSP hi an hmang a ni.

India chuan GSP hamṭhatna hi hman chhunzawm tir zel turin nikum August thla khan a lo ngen tawh a, hemi hmanga India aṭanga bungrua man tlawm zawka an thawnluh chuan US industry-ahte inelna ṭha tak siamin, US firm-te pawh ramchhung leh khawvel huapa intihsiakna kawngah a pui a ni, a ti.